ANGRAU శాస్త్రవేత్తలు అభివృద్ధి చేసిన కొత్త బీటీ ప్రత్తి వంగడం 'LAM BG II-2208' విత్తనాలు విడుదల

ఆంధ్రప్రదేశ్ వ్యవసాయ శాఖ మంత్రి కింజరాపు అచ్చెన్నాయుడు కొత్త బీటీ ప్రత్తి వంగడం విత్తనాలను విడుదల చేశారు. ఆచార్య ఎన్జీ రంగ వ్యవసాయ విశ్వవిద్యాలయం (ANGRAU) శాస్త్రవేత్తలు అభివృద్ధి చేసిన ‘LAM BG II-2208’ అనే ఈ కొత్త రకాన్ని రైతులకు అందించారు.

ప్రస్తుతం రైతులు ప్రైవేటు సంస్థల నుంచి అధిక ధరకు విత్తనాలు కొనుగోలు చేయాల్సి వస్తోందని, విత్తనాల కల్తీ సమస్యల వల్ల నష్టపోతున్నారని మంత్రి అచ్చెన్నాయుడు తెలిపారు. బీటీ సాంకేతికతపై పేటెంట్ హక్కులు ముగిసిన తర్వాత, సుమారు తొమ్మిదేళ్ల పాటు శాస్త్రీయ పరిశోధనలు, అఖిల భారత స్థాయి పరీక్షలు నిర్వహించి ఈ రకాన్ని రూపొందించినట్లు ANGRAU శాస్త్రవేత్తలు తెలిపారు.

ఈ కొత్త వంగడం ఆంధ్రప్రదేశ్ తో పాటు తెలంగాణ, కర్ణాటక, తమిళనాడు రాష్ట్రాల్లో సాగుకు అనుకూలంగా ఉన్నట్లు సిఫారసు చేశారు. ప్రభుత్వ రంగ వ్యవసాయ విశ్వవిద్యాలయాలు చేస్తున్న పరిశోధనలు రైతులకు ఉపయోగకరంగా ఉంటాయని మంత్రి అన్నారు.