సిరిసిల్లలో విత్తన మేళాలో ప్రభుత్వ విప్ ఆది శ్రీనివాస్; సన్న వడ్లు సాగు చేస్తే రూ.500 బోనస్

రాజన్న సిరిసిల్ల జిల్లా మరిగడ్డలో జరిగిన ప్రభుత్వ విత్తన మేళా కార్యక్రమంలో ప్రభుత్వ విప్ ఆది శ్రీనివాస్ పాల్గొన్నారు. ఈ సందర్భంగా ఆయన రైతులనుద్దేశించి మాట్లాడారు.

తెలంగాణ రాష్ట్రంలో మాత్రమే సన్న బియ్యం సరఫరా చేస్తున్నామని, దేశంలో మరే రాష్ట్రం ఇలా చేయడం లేదని ఆది శ్రీనివాస్ చెప్పారు. సన్న వడ్లు పండిస్తే క్వింటాలుకు రూ.500 బోనస్ ఇస్తున్నామన్నారు. ప్రభుత్వం సూచించిన ఏడు రకాల సన్న వడ్లనే రైతులు పండించాలని ఆయన కోరారు.

ఈ విత్తన మేళాలో ఏడు రకాల సన్న వడ్ల విత్తనాలను రైతులకు అందిస్తున్నట్లు తెలిపారు. డీలర్లు, రైతు వేదికలు, డీసీఎంఎస్, మార్కెట్ల ద్వారా ఈ విత్తనాలు సరఫరా చేస్తున్నామన్నారు. ఈ నెల 23 నుంచి 30 వరకు ఈ విత్తన మేళా కొనసాగుతుందని చెప్పారు.

గతంలో రైతు రుణాలు ఒకేసారి మాఫీ చేసిన చరిత్ర తమ ప్రభుత్వానిదేనని ఆది శ్రీనివాస్ పేర్కొన్నారు. కాంగ్రెస్ పార్టీ లక్ష్యం రైతులను ఆదుకోవడమేనని ఆయన అన్నారు.