హంద్రీనీవా మడకసిరా బ్రాంచ్ కెనాల్ పనులు: జీడిపల్లి రిజర్వాయర్‌కు 52 టీఎంసీల నీరు

ఉమ్మడి అనంతపురం జిల్లాలో హంద్రీనీవా కాలువ వెడల్పు పనులు వేగంగా సాగుతున్నాయి. గత ఆరు నెలల్లో ప్రధాన కాలువ లైనింగ్ పనులు పూర్తి చేసిన అధికారులు, ప్రస్తుతం మడకసిరా బ్రాంచ్ కెనాల్ వెడల్పు పనులను మూడు ప్యాకేజీలుగా చేపట్టారు.

హంద్రీనీవా మెయిన్ కెనాల్ కర్నూలు జిల్లా మల్యాల నుంచి అనంతపురం జిల్లా జీడిపల్లి రిజర్వాయర్ వరకు వెడల్పు చేయడం వల్ల ఈ ఏడాది జీడిపల్లి రిజర్వాయర్‌కు 52 టీఎంసీల నీరు చేరింది. దీనితో అదనంగా 12 టీఎంసీల నీరు లభించింది. జీడిపల్లి రిజర్వాయర్ నుంచి కుప్పం వరకు కాలువ లైనింగ్ పూర్తయ్యాయి.

మడకసిరా బ్రాంచ్ కెనాల్ 173 కిలోమీటర్ల పొడవు ఉండగా, 71 కిలోమీటర్ల మేర కాలువ వెడల్పు చేస్తున్నారు. 790 కోట్ల రూపాయల వ్యయంతో చేపడుతున్న ఈ పనులు వచ్చే ఏడాదికి పూర్తికానున్నాయి. ప్రస్తుతం మడకసిరా బ్రాంచ్ ద్వారా 407 క్యూసెక్కులు ప్రవహిస్తుండగా, పనులు ముగిస్తే 643 క్యూసెక్కుల నీటిని తీసుకువెళ్లేలా సామర్థ్యం పెరుగుతుంది.

కాలువ వెడల్పు వల్ల భూగర్భ జలాలు పెరిగి పంటలకు, పశువులకు మేలు జరుగుతుందని స్థానిక రైతులు హర్షం వ్యక్తం చేస్తున్నారు. హిందుపురం, పెనుగొండ, మడకసిర నియోజకవర్గాల ప్రజలకు ఈ బ్రాంచ్ కాలువ వరంగా మారుతుందని ప్రభుత్వం పేర్కొంది.