ఆదిలాబాద్‌లో అంతర్రాష్ట్ర చైన్ స్నాచింగ్ గ్యాంగ్ అరెస్టు: ఎనిమిది మంది నిందితులు

ఆదిలాబాద్, నిర్మల్ పట్టణాల్లో చైన్ స్నాచింగ్ చేస్తున్న అంతర్రాష్ట్ర గ్యాంగ్‌ను పోలీసులు అరెస్టు చేశారు. ఈ గ్యాంగ్‌కు చెందిన ఎనిమిది మందిని పట్టుకున్నట్లు ఆదిలాబాద్ SP అఖిల్ మహాజన్ విలేకరులకు తెలిపారు.

నిందితుల నుంచి పది తులాల బంగారం, ఒక కారు, ఒక ఆటో, సెల్ ఫోన్‌లను స్వాధీనం చేసుకున్నారు. ఈ గ్యాంగ్ తెలంగాణతో పాటు కర్ణాటక, మహారాష్ట్ర, ఛత్తీస్‌గఢ్ రాష్ట్రాల్లోనూ చోరీలు చేసిందని SP తెలిపారు. అరెస్టు అయిన వారిలో ముగ్గురు మహిళలు ఉన్నారు.

ఆదిలాబాద్ వినాయక్ చౌక్‌లో ఈ గ్యాంగ్ ఒక మహిళను లక్ష్యంగా చేసుకుంది. ఒక ఆటో ఆమె ముందు ఆగి ఉచితంగా దింపుతామని చెప్పి ఎక్కించుకుంది. ఆటోలో వాంతులు చేసినట్లు నాటకం ఆడుతూ ఆమె మెడలోని చైన్‌ను కత్తిరించారు. సుమారు రెండు గంటల తర్వాత ఆమెకు విషయం తెలిసింది.

ఘటనపై వెంటనే FIR నమోదు చేశారు. DSP సునీల్ ఆధ్వర్యంలో వన్ టౌన్ ఇన్‌స్పెక్టర్, చీఫ్ స్టేషన్ ఇన్‌స్పెక్టర్, సైబర్ టీమ్‌ను కలిపి ప్రత్యేక టీం ఏర్పాటు చేశారు. టెక్నికల్ ఆధారాలతో నిందితులను పట్టుకున్నట్లు SP చెప్పారు.

నిందితులంతా మహారాష్ట్రకు చెందినవారు. వీరిలో ఇద్దరు ఉత్తరప్రదేశ్‌కు చెందినవారని SP తెలిపారు. వీరిపై గతంలో జైలు శిక్ష రికార్డు ఉన్నట్లు ఇప్పటివరకు సమాచారం లేదని ఆయన అన్నారు. ఈ గ్యాంగ్ ఒక సిల్వర్ రంగు వాహనం, ఒక ఆటోతో పట్టణానికి వస్తుంది. మహిళలను ఆటోలో ఎక్కించి, మిగిలినవారు కారులో వెళ్తారు.

వినాయక్ చౌక్ ఘటన తర్వాత మూడు రోజుల క్రితం వీరు నిర్మల్‌లో రెండు చోరీలు చేసినట్లు SP తెలిపారు. ప్రజలు అప్రమత్తంగా ఉండాలని, ఇంటి బయట, లోపల CCTV కెమెరాలు ఏర్పాటు చేసుకోవాలని ఆయన సూచించారు. కెమెరాల ఫుటేజ్ ఉంటే నేరస్థులను వేగంగా పట్టుకోవచ్చని, పోయిన బంగారాన్ని వెతకడం సులభమవుతుందని ఆయన అన్నారు.