ఆదిలాబాద్ జిల్లాలో భారీ వర్షాలు: రోడ్లు మూత, పాఠశాలలకు సెలవు

ఆదిలాబాద్, కొమరం భీం, మంచిర్యాల, నిర్మల్ జిల్లాల్లో మూడు రోజులుగా భారీ నుంచి అతి భారీ వర్షాలు కురుస్తున్నాయి. వాగులు, వంకలు పొంగి లోతట్టు ప్రాంతాలు జలమయమయ్యాయి.

తర్ణం వాగుపై నిర్మాణంలో ఉన్న లో లెవల్ కాజ్వే నిండి వరద నీరు ప్రవహిస్తుండడంతో ఆదిలాబాద్ నుంచి మహారాష్ట్రలోని చంద్రపూర్ వెళ్లే మార్గం మూసివేయబడింది. ఇరువైపులా భారీ వాహనాలు నిలిచిపోయాయి. పోలీసులు భద్రత ఏర్పాటు చేసి ట్రాఫిక్ మళ్లించారు.

పెంచికల్పేట మండలం కొండపల్లి సమీపంలో గొల్లవాగు దాటుతుండగా ఓ బొలేరో వాహనం వరదలో చిక్కుకుంది. జేసీబీ సాయంతో దాన్ని బయటకు తీసే ప్రయత్నాలు కొనసాగుతున్నాయి.

వట్టివాగు ప్రాజెక్టుకు భారీ ఇన్‌ఫ్లో రావడంతో మూడు గేట్లు ఎత్తి నీటిని దిగువకు విడుదల చేశారు. సుష్మీర్ వాగు పొంగడం వల్ల 12 గ్రామాల సంబంధాలు తెగిపోయాయి. నిర్మల్, కొమరం భీం జిల్లాల్లో పాఠశాలలకు సెలవు ప్రకటించారు. మంచిర్యాల, కొమరం భీం జిల్లాల్లో ఓపెన్ కాస్ట్ బొగ్గు గనుల్లో వేల టన్నుల ఉత్పత్తి, తరలింపు నిలిచిపోయాయి.

వాతావరణ శాఖ మరింత వర్షం కురిసే అవకాశం ఉందని హెచ్చరించడంతో జిల్లా యంత్రాంగం అప్రమత్తమైంది.