ఆదిలాబాద్ రిమ్స్‌లో పీజీ విద్యార్థినిపై లైంగిక వేధింపులు — నర్సింగ్ అధికారి అరెస్ట్

ఆదిలాబాద్ రిమ్స్ ఆసుపత్రిలో పీజీ నాల్గవ సంవత్సరం వైద్య విద్యార్థినిపై లైంగిక వేధింపుల ఘటన చోటు చేసుకుంది. ఈ నెల 9వ తేదీ అర్ధరాత్రి ఆపరేషన్ థియేటర్‌లో ఈ ఘటన జరిగింది.

నర్సింగ్ అధికారి కోటావార్ సాయిరామ్ ఆమెను లైంగికంగా వేధించే ప్రయత్నం చేశాడని ఆరోపణలు వచ్చాయి. విధులు ముగించుకున్న తర్వాత ఒంటరిగా ఉన్న విద్యార్థినిపై సాయిరామ్ దాడికి పాల్పడగా, ఆమె కేకలు వేయడంతో అక్కడి నుంచి పరారయ్యాడు.

బాధితురాలు రిమ్స్ డైరెక్టర్ డాక్టర్ జైసింగ్ రాథోడ్‌కు మరియు స్థానిక పోలీస్ స్టేషన్‌లో ఫిర్యాదు చేశారు. జూనియర్ డాక్టర్స్ అసోసియేషన్ (JUDA) కూడా రిమ్స్ సంచాలకులకు సమాచారం ఇచ్చింది. పోలీసులు BNS సెక్షన్లు 72, 75, 121/2 కింద కేసు నమోదు చేసి, ఈ నెల 13వ తేదీన సాయిరామ్‌ను అరెస్ట్ చేసి రిమాండ్‌కు తరలించారు.

రిమ్స్ డైరెక్టర్ డాక్టర్ రాథోడ్ జైసింగ్ లైంగిక వేధింపుల ఘటన వాస్తవమేనని ధృవీకరించారు. సంఘటన అనంతరం ఏడుగురు సభ్యులతో విచారణ కమిటీని నియమించినట్లు తెలిపారు. కలెక్టర్ రాజశీర్ష సమగ్ర విచారణ జరపాలని ఆదేశించారు.

JUDA నేతలు సాయిరామ్‌పై కఠిన చర్యలు తీసుకోవాలని డిమాండ్ చేశారు. అన్ని ప్రభుత్వ వైద్య కళాశాలల్లో అంతర్గత విచారణ కమిటీలు ఏర్పాటు చేయాలని కోరారు. డైరెక్టర్ పూర్తిస్థాయి చర్యలు తీసుకోకుంటే నిరసనలు చేపడతామని హెచ్చరించారు.