ఇసుక ఆరోపణలు నిరూపిస్తే రాజీనామా: మంత్రి లక్ష్మణ్‌కుమార్‌ సవాల్

పెద్దపల్లి జిల్లా ధర్మారంలో ధాన్యం కొనుగోలు కేంద్రాలను సంక్షేమ శాఖ మంత్రి అడ్లూరి లక్ష్మణ్ కుమార్ పరిశీలించారు. అకాల వర్షాలతో తడిసిన ధాన్యాన్ని కూడా కొనుగోలు చేస్తామని ఆయన హామీ ఇచ్చారు.

ఈ సందర్భంగా మాజీ మంత్రి కొప్పుల ఈశ్వర్ తనపై చేసిన ఇసుక అక్రమ రవాణా ఆరోపణలపై మంత్రి మండిపడ్డారు. తాను అక్రమ ఇసుక దందా ద్వారా ఒక్క రూపాయి కూడా తీసుకున్నట్లు నిరూపిస్తే పదవికి రాజీనామా చేస్తానని సవాల్ విసిరారు.

అనంతరం బీఆర్ఎస్ పార్టీపై విమర్శలు గుప్పించారు. ఆ పార్టీ హయాంలో విచ్చలవిడిగా ఇసుక అక్రమ రవాణా జరిగిందని, రోజుకు వేలాది లారీలు అక్రమంగా తిరిగాయని ఆయన ఆరోపించారు. ఇసుక లారీ ప్రమాదంలో ఒక దళితుడు మృతి చెందగా, ఆయన కుటుంబాన్ని బెదిరించి కొట్టించడంతో వారి జీవితం రోడ్డున పడిందని మంత్రి లక్ష్మణ్‌కుమార్ పేర్కొన్నారు.