అడ్రియాల లాంగ్ వాల్ ప్రాజెక్ట్‌లో సింగరేణికి భారీ నష్టాలు: టన్నుకు రూ.8,500 నష్టం

పెద్దపల్లి జిల్లాలోని అడ్రియాల లాంగ్ వాల్ బొగ్గు గని ప్రాజెక్టు ప్రస్తుతం సింగరేణి సంస్థకు తీవ్ర నష్టాలు తెస్తోంది. సాంకేతిక సమస్యలు, ఉత్పత్తి తీవ్ర పతనం కారణంగా ఖర్చులు పెరిగి ఆదాయం క్షీణించిందని సింగరేణి వర్గాల సమాచారం తెలియజేస్తోంది.

ప్రాజెక్టు వివరాల ప్రకారం, ఒక మెట్రిక్ టన్ను బొగ్గు వెలికితీతకు సుమారు రూ.10 వేల నుంచి రూ.12 వేల వరకు ఖర్చు అవుతోంది. ఆ బొగ్గు ద్వారా వచ్చే ఆదాయం కేవలం రూ.3,500 మాత్రమే. దీంతో టన్నుకు రూ.8,500 నష్టం నమోదవుతోంది. 2015లో అంతర్జాతీయ ప్రమాణాలతో నిర్మించిన ఈ గని రోజుకు 5,000 మెట్రిక్ టన్నుల బొగ్గు ఉత్పత్తి సామర్థ్యంతో ప్రారంభమైంది. కానీ ప్రస్తుతం రోజుకు 700 మెట్రిక్ టన్నుల బొగ్గు మాత్రమే ఉత్పత్తి అవుతోంది.

అడ్రియాల గనిలో మూడేళ్ల క్రితం మూడో ప్యానెల్‌లో అగ్ని ప్రమాదం జరగడంతో షేరర్, 89 సపోర్టింగ్ చాకులు సీల్ చేయాల్సి వచ్చింది. ఇప్పుడు 56 చాకులతో కొనసాగుతున్న ఉత్పత్తి బాగా క్షీణించింది. ఈ గని కోసం దాదాపు రూ.1,500 కోట్లతో జర్మనీ, చైనా నుంచి అత్యాధునిక లాంగ్ వాల్ యంత్రాలు దిగుమతి చేసుకున్నారు. 9 కిలోమీటర్ల కన్వేయర్ బెల్ట్, 11 కె.వి. హైవోల్టేజ్ వ్యవస్థ వంటి హంగులు ఉన్నాయి.

78.59 మిలియన్ టన్నుల నిక్షేపాలతో 35 ఏళ్ల పాటు బొగ్గు వెలికితీయాలన్న ప్రతిష్టాత్మక లక్ష్యం సాధ్యం కాకపోయే ప్రమాదం ఉందని సంస్థ వర్గాలు అంచనా వేస్తున్నాయి. ప్రస్తుతం సాంకేతిక సమస్యలను పరిష్కరించేందుకు సింగరేణి యాజమాన్యం ప్రయత్నాలు చేపట్టనుంది.