ఇబ్రహీంపట్నంలో కల్తీ పాలు తయారీ: ఒకరి అరెస్టు, 100 లీటర్లు స్వాధీనం

రంగారెడ్డి జిల్లా ఇబ్రహీంపట్నం మండలం పోచారం గ్రామంలో కల్తీ పాలు తయారు చేస్తున్న ఓ వ్యక్తిని మహేశ్వరం SOT పోలీసులు అరెస్టు చేశారు. ఈ కల్తీ పాల కేంద్రంపై పోలీసులు ఆకస్మిక దాడి చేశారు.

దాడిలో 100 లీటర్ల కల్తీ పాలు, ఒక లీటర్ హైడ్రోజన్ పెరాక్సైడ్, 35 కిలోల డాల్ఫర్ బ్రాండ్ మిల్క్ పౌడర్‌ను పోలీసులు స్వాధీనం చేసుకున్నారు. రసాయనాలు, పాల పౌడర్ కలిపి పాలు తయారు చేస్తున్నట్టు పోలీసులు గుర్తించారు.

పోచారం గ్రామానికి చెందిన ఆండే శ్రీశైలం అనే వ్యక్తిని పోలీసులు కస్టడీలోకి తీసుకున్నారు. ఇక్కడ తయారు చేసిన కల్తీ పాలు హైదరాబాద్‌లో అమ్ముతున్నట్టు పోలీసులు గుర్తించారు.

ప్రజల ఆరోగ్యంతో ఆడుకునే వారిపై కఠిన చర్యలు తీసుకుంటామని పోలీసులు హెచ్చరించారు.