పెరియార్ లైబ్రరీ పుస్తక కొనుగోలు అవకతవకలపై తమిళనాడు విచారణ ఆదేశం

పెరియార్ లైబ్రరీకి పుస్తకాలు కొనుగోలు చేసే ప్రక్రియలో భారీ అవకతవకలు జరిగాయన్న ఆరోపణలపై తమిళనాడు ప్రభుత్వం విచారణకు ఆదేశించింది. స్కూల్ ఎడ్యుకేషన్ మంత్రి రాజ్‌మోహన్ ఈ అంశంపై డీటెయిల్డ్ విచారణ జరుగుతుందని తెలిపారు. గత DMK ప్రభుత్వ హయాంలో ఈ కొనుగోలు ప్రక్రియ జరిగిందని ఆరోపణలు వస్తున్నాయి.

అవార్డు పొందిన రచయిత పెరుమాళ్ మురుగన్ ఒక ప్రాంతీయ పత్రికలో రాసిన కాలమ్‌లో ఈ అక్రమాలను వెల్లడించారు. నిర్ణీత ధర కంటే చాలా ఎక్కువ ధరకు పుస్తకాలు కొనుగోలు చేశారని, షెల్ఫ్‌లపై అసంబద్ధమైన పుస్తకాలు ఉన్నాయని ఆయన పేర్కొన్నారు. కొన్ని పుస్తకాల్లో కల్పిత ముఖ్యమంత్రుల పేర్లు రాశారని, చాలా పుస్తకాలు AI ద్వారా తయారైనవని, రచయితల పేర్లు సందిగ్ధంగా ఉన్నాయని ఆయన ఆరోపించారు. ప్రభుత్వం నియమించిన పుస్తక సిఫారసు కమిటీలో పెరుమాళ్ మురుగన్ సభ్యుడు అనేది గమనార్హం.

కమల్ హాసన్ ఈ అంశంపై తీవ్రంగా స్పందించారు. తమిళ భాషకు ఇంతకంటే పెద్ద అవమానం మరొకటి లేదని ఆయన అన్నారు. ఇలాంటి నకిలీ పుస్తకాలు చదివి, వాటిని ప్రసంగాలు, రచనలు, పరిశోధనల్లో చేర్చుకుంటే దీర్ఘకాలంలో భారీ నష్టం జరుగుతుందని ఆయన హెచ్చరించారు. నకిలీ పుస్తకాలను అన్ని లైబ్రరీల నుంచి వెంటనే ఉపసంహరించి వీధుల్లో కాల్చేయాలని, మోసపూరిత ప్రచురణ సంస్థలను సీల్ చేయాలని ఆయన ప్రభుత్వాన్ని కోరారు. ఈ మోసాన్ని బయటపెట్టిన రచయిత పెరుమాళ్ మురుగన్‌కు కృతజ్ఞతలు తెలియజేయాల్సిన బాధ్యత మనపై ఉందని కమల్ హాసన్ పేర్కొన్నారు.

ఈ అంశంపై Congress నుంచి లెఫ్ట్ పార్టీల వరకు విచారణకు డిమాండ్ చేశాయి. మరోవైపు ఈ ఆరోపణలపై DMK, TVK ప్రభుత్వంపై విరుచుకుపడింది. విచారణ నివేదిక ఎప్పటికి అందుతుందన్న దానిపై ప్రభుత్వం ఇంకా ప్రకటన చేయలేదు.