Karnataka పెట్రోల్ పరీక్షల్లో 63 నమూనాల్లో ఇథనాల్ 25 శాతం పైగా

కర్ణాటకలో జరిపిన పెట్రోల్ నాణ్యత పరీక్షల్లో ప్రధాన ఆయిల్ మార్కెటింగ్ కంపెనీల నుంచి సేకరించిన 63 నమూనాల్లో ఇథనాల్ నిష్పత్తి 25 శాతానికి పైగా ఉన్నట్లు తేలింది. కేంద్ర ప్రభుత్వం దేశవ్యాప్తంగా అమలు చేస్తున్న E20 మిశ్రమ పరిమితిని ఈ నమూనాలు దాటుతున్నాయి.

తమ పెట్రోల్‌లో ఎంత ఇథనాల్ కలుపుతున్నారనే దానిపై ఆయా కంపెనీలు స్పష్టమైన సమాధానం ఇవ్వలేదని పరీక్షల ప్రక్రియతో అనుబంధం ఉన్న వర్గాలు తెలిపాయి. నమూనాలను ప్రయోగశాలలో పరీక్షించిన అనంతరం ఈ ఫలితాలు వెల్లడయ్యాయి.

E20 అంటే పెట్రోల్‌లో 20 శాతం ఇథనాల్ కలపడం. 2023 తర్వాత తయారైన వాహనాలను మాత్రమే E20 అనుకూల ప్రమాణాలతో రూపొందించారు. దేశంలోని మొత్తం వాహనాల్లో ఇలాంటివి చాలా తక్కువ శాతమే. దీంతో 99 శాతం వాహనాలు E20 మించిన మిశ్రమాన్ని భరించలేవని నిపుణులు చెబుతున్నారు. E20 అనుకూల వాహనాలకూ ఇథనాల్ శాతం ఎక్కువగా ఉంటే సమస్యలు వస్తాయని హెచ్చరిస్తున్నారు.

కొత్త ఇంధనం, కొత్త ఇంజిన్, కొత్త వాహనం, కొత్త టెక్నాలజీ ఏది విడుదల చేసినా దానికి ధ్రువీకరణ ఇచ్చే అధికారిక సంస్థ ఆటోమోటివ్ రీసెర్చ్ అసోసియేషన్ ఆఫ్ ఇండియా (ARAI) మాత్రమే. కానీ సాధారణ వాహనాల్లో ఇథనాల్ శాతం పెరిగితే ఇంధన వ్యవస్థ భాగాలపై ప్రభావం పడుతుంది. రబ్బరు గొట్టాలు, గ్యాస్కెట్లు, సీల్స్, ఓ-రింగ్‌లు పాడైపోతాయని నిపుణులు చెబుతున్నారు.

ఇది ఒక్క కర్ణాటకకే పరిమితమైన సమస్య కాదు. కేంద్ర ప్రభుత్వ ఇథనాల్ మిశ్రమ విధానం దేశవ్యాప్తంగా అమలవుతోంది. అదే ఆయిల్ మార్కెటింగ్ కంపెనీలు ఆంధ్రప్రదేశ్, తెలంగాణతో సహా అన్ని రాష్ట్రాల్లో పెట్రోల్ సరఫరా చేస్తాయి. దీంతో ఇక్కడి వాహనదారులపైనా ఇది ప్రభావం చూపగలదు.

ప్రస్తుతానికి తమ పెట్రోల్‌లో ఇథనాల్ శాతం ఎంత అనే దానిపై ఆయిల్ మార్కెటింగ్ కంపెనీలు స్పష్టమైన సమాధానం ఇవ్వలేదు.