లడ్డు, సమోసా, జిలేబీల ఆకారంలో కొవ్వొత్తులు.. తమిళనాడు మహిళా పారిశ్రామికవేత్త వినూత్న డిజైన్లు

తమిళనాడులోని తూతుకుడికి చెందిన మహిళా పారిశ్రామికవేత్త కృతిక వీరకన్న లడ్డు, సమోసా, అచ్చు, మురుకు, జిలేబీల ఆకారంలో కొవ్వొత్తులను తయారు చేస్తున్నారు. ఈ కొవ్వొత్తులను చూడగానే నిజమైన తినుబండారాలేనన్నట్టు భ్రమ కలుగుతుంది. కానీ అవి తినడానికి మాత్రం కాదు.

పర్యావరణ హితమైన సోయా వ్యాక్స్, బీ వ్యాక్స్ ఉపయోగించి ఈ కొవ్వొత్తులను తయారు చేస్తున్నారు. స్వీట్లను తయారు చేసినట్టే ఖచ్చితమైన కొలతలు, ఆకారాలతో వాటిని తీర్చిదిద్దుతున్నారు. దేశంలో ప్రసిద్ధమైన పిండివంటల రూపంలో ఈ కొవ్వొత్తులు తయారవుతుండటం ప్రత్యేకత.

ప్రతి ఏడాది దీపావళికి కొత్త థీమ్‌తో కొవ్వొత్తులను డిజైన్ చేస్తున్నట్లు కృతిక తెలిపారు. సంప్రదాయ పిండివంటలు ఉన్న స్వీట్ల ప్లేట్ రూపంలో, ఫిల్టర్ కాఫీ కప్పుల రూపంలో కూడా ఆమె కొవ్వొత్తులను తయారు చేస్తున్నారు.

దీపావళితో పాటు క్రిస్మస్, నూతన సంవత్సరం, నవరాత్రి వంటి పండుగల కోసం కూడా సువాసన వెదజల్లే రకరకాల డిజైన్లలో ఈ కొవ్వొత్తులను తయారు చేస్తున్నట్లు కృతిక తెలిపారు.