తమిళనాడు మత్స్యకారుల బోటు ప్రమాదంపై చంద్రబాబు తీవ్ర విచారం

ప్రకాశం జిల్లా కొత్తపట్నం సముద్ర తీరానికి ఒక మత్స్యకారుల బోటు కొట్టుకొచ్చింది. ఈ బోటులో తొమ్మిది మంది ప్రయాణిస్తున్నారు. వీరిలో ఏడుగురు మృతి చెందగా, మరో ఇద్దరు గల్లంతయ్యారు. తమిళనాడుకు చెందిన మత్స్యకారుల ఈ బోటు ప్రమాదంపై ముఖ్యమంత్రి చంద్రబాబు తీవ్ర విచారం వ్యక్తం చేశారు.

తుఫాను ప్రభావంతో సముద్రంలో ప్రతికూల వాతావరణ పరిస్థితులు నెలకొన్న సమయంలో ఈ ప్రమాదం జరిగింది. ఇలాంటి పరిస్థితుల్లో మత్స్యకారులు చిక్కుకొని మరణించడం దురదృష్టకరమని సీఎం అన్నారు. మృతుల కుటుంబాలకు ఆయన ప్రగాఢ సానుభూతి తెలిపారు.

గల్లంతైన ఇద్దరి కోసం జరుగుతున్న గాలింపు చర్యలపై సీఎం అధికారులను అడిగి తెలుసుకున్నారు. గత మూడు రోజులుగా గాలింపు చర్యలు చేపడుతున్నామని అధికారులు వివరించారు. ఇద్దరి ఆచూకీ కోసం గాలింపు కొనసాగుతుందని వారు తెలిపారు.

కోస్ట్ గార్డ్, మెరైన్ పోలీసులు, స్థానిక మత్స్యకారుల బృందాలు సహా సంబంధిత అన్ని విభాగాలు సమన్వయంతో పని చేయాలని సీఎం సూచించారు. మృతదేహాలను గుర్తించి, పోస్ట్మార్టం సహా అవసరమైన ప్రక్రియలను త్వరితగతిన పూర్తి చేసి కుటుంబాలకు అప్పగించేలా చర్యలు తీసుకోవాలని ఆదేశించారు.

మత్స్యకారులు తమిళనాడు రాష్ట్రానికి చెందిన వారు. అక్కడి అధికారులతో సమన్వయం చేసుకుంటూ, మృతదేహాలను వారి స్వస్థలాలకు తరలించేందుకు అవసరమైన ఏర్పాట్లు చేయాలని సీఎం అన్నారు.