అగ్రిగోల్డ్ భూముల వేలం: 6,330 ఎకరాలు సిద్ధం, సెప్టెంబర్ 15 నుంచి ప్రక్రియ

అగ్రిగోల్డ్ బాధితులకు న్యాయం చేసేందుకు 6,330 ఎకరాల భూములను వేలం వేయాలని రాష్ట్ర మంత్రివర్గ ఉపసంఘం నిర్ణయించింది. బుధవారం సచివాలయంలో జరిగిన సమావేశంలో ఈ మేరకు కీలక నిర్ణయం తీసుకున్నట్లు మంత్రి నాదెండ్ల మనోహర్ తెలిపారు.

దేశవ్యాప్తంగా అగ్రిగోల్డ్‌కు చెందిన 23,430 ఎకరాల భూమిని గుర్తించామని, అందులో 20,450 ఎకరాలు ఆంధ్రప్రదేశ్‌లో ఉన్నాయని మంత్రి వివరించారు. ఇప్పటికే 14,304 ఎకరాలను సీఐడీ, పోలీస్ శాఖకు అప్పగించగా, మిగిలిన 6,330 ఎకరాలు వేలానికి అనుకూలంగా ఉన్నాయి. ఈ నెల 11న ముఖ్య కార్యదర్శితో సమావేశమై వేలం విధానాలను ఖరారు చేస్తామన్నారు.

వేలం ప్రక్రియ సెప్టెంబర్ 15 నాటికి ప్రారంభమవుతుందని, బాధితులకు సొంత డాక్యుమెంట్లు అందించే వరకు కొనసాగుతుందని చెప్పారు. పారదర్శకత కోసం ప్రత్యేక వెబ్‌సైట్, డ్యాష్‌బోర్డ్ ఏర్పాటు చేస్తామన్నారు. ఇతర రాష్ట్రాల్లోని బాధితుల కోసం స్థానికంగా నోడల్ అధికారులను నియమించి, బాండ్లను స్వీకరించే ఏర్పాటు చేస్తామన్నారు.

కొన్ని భూముల్లో ఎర్రచందనం చెట్లు నరికివేసిన ఘటనలపై నోడల్ అధికారిని నియమించాలని, ఆ కలపను వేలం వేయాలని డిప్యూటీ సీఎం‌ను కోరనున్నట్లు మంత్రి తెలిపారు. 2015 మార్చి 1 నాటికి రిజిస్ట్రేషన్ పూర్తయిన ప్లాట్ల యజమానులు సీఐడీ కార్యాలయాల్లో పత్రాలు సమర్పిస్తే 22ఏ జాబితా నుంచి తొలగించి ఫ్రీ హోల్డ్ చేస్తామన్నారు.

అగ్రిగోల్డ్ బాధితుల సంఘం అధ్యక్షుడు ముప్పాళ్ల నాగేశ్వరరావు మంత్రివర్గ ఉపసంఘానికి 11 అంశాల వినతిపత్రం అందచేశారు. కుంభకోణంలో మరణించిన వారికి పరిహారం, బినామీ ఆస్తుల రికవరీ, భూములను చిన్న బిట్లుగా వేలం వేయాలని కోరారు. ఇప్పటికే ప్రత్యేక న్యాయస్థానం సిద్ధంగా ఉందని, చీఫ్ జస్టిస్ న్యాయమూర్తిని నియమిస్తే ప్రక్రియ మరింత వేగవంతమవుతుందని మంత్రి పేర్కొన్నారు.