అన్నాడీఎంకే సంక్షోభం సద్దుమనిగింది — EPS-వేలుమణి మధ్య రాజీ కుదిరింది

తమిళనాడులో అన్నాడీఎంకే పార్టీలో కొన్ని రోజులుగా సాగిన అంతర్గత సంక్షోభానికి తాత్కాలికంగా బ్రేక్ పడింది. పార్టీ అధినేత పళనిస్వామి (EPS), సీనియర్ నేత SP వేలుమణి వర్గాల మధ్య రాజీ ఒప్పందం కుదిరినట్లు సమాచారం.

వేలుమణి వంపు 16 మంది ఎమ్మెల్యేలు అసెంబ్లీ విశ్వాస పరీక్షలో TVK ప్రభుత్వానికి మద్దతుగా ఓటు వేశారు. ఇది పార్టీలో తీవ్ర విభేదాలకు దారితీసింది. EPS ఈ ఎమ్మెల్యేలపై అనర్హత పిటిషన్లు దాఖలు చేశారు.

ఈ నేపథ్యంలో సీనియర్ నేత తంగమణి సమన్వయకర్తగా రంగంలోకి దిగారు. అనర్హత పిటిషన్లు వెనక్కి తీసుకోవడం, భవిష్యత్తులో పార్టీ నిర్ణయాల్లో వేలుమణి వర్గానికి తగిన ప్రాధాన్యం ఇవ్వడం — ఈ రెండు అంశాలపై హామీలు ఇచ్చినట్లు వార్తలు వస్తున్నాయి.

ఇదే సమయంలో TVK పార్టీలో చేరికలు కొనసాగుతున్నాయి. ఇప్పటికే నలుగురు అన్నాడీఎంకే ఎమ్మెల్యేలు రాజీనామా చేసి TVK లో చేరారు. దీంతో అన్నాడీఎంకే బలం 43 మందికి తగ్గింది. మిగిలిన ఎమ్మెల్యేలు TVK వైపు వెళ్లకుండా అడ్డుకునేందుకే EPS ఈ రాజీ ఫార్ములాకు అంగీకరించారని పరిశీలకులు భావిస్తున్నారు.

ఈ నెల 28న స్పీకర్‌కు సమర్పించే లేఖల ప్రక్రియ పూర్తయిన తర్వాత తమిళనాడు రాజకీయాల్లో అన్నాడీఎంకే వ్యూహం ఏమిటో స్పష్టమవుతుందని రాజకీయ విశ్లేషకులు చెప్తున్నారు.