ఫుకెట్-ఢిల్లీ ఎయిర్ ఇండియా విమానం ఘటనలో పైలట్ గంజాయి సేవించినట్టు నిర్ధారణ

ఆగస్టు 4న ఫుకెట్ నుంచి ఢిల్లీకి వెళ్తున్న ఎయిర్ ఇండియా విమానం AI2379 తీవ్ర టర్బులైన్స్‌కు గురైంది. ఈ ఘటనలో విమానం 300 అడుగుల మేర ఒక్కసారిగా కిందకు పడిపోవడంతో 13 మంది ప్రయాణికులు, నలుగురు సిబ్బంది తీవ్రంగా గాయపడ్డారు.

ఘటనపై డైరెక్టర్ జనరల్ ఆఫ్ సివిల్ ఏవియేషన్ (DGCA) విచారణకు ఆదేశించింది. ఓ ప్రయాణికుడు ఫిర్యాదు చేయడంతో చర్యలు ప్రారంభమయ్యాయి. విచారణలో భాగంగా విమానం దిగిన వెంటనే పైలట్‌కు డోప్ టెస్ట్ నిర్వహించారు. తొలి పరీక్షలో సైకో యాక్టివ్ పదార్థాల వినియోగంపై అనుమానాస్పద ఫలితం వచ్చింది. తర్వాత జరిపిన రెండో డోప్ టెస్ట్‌లో పైలట్ గంజాయి సేవించినట్టు నిర్ధారణ అయింది. వైద్య నివేదిక కూడా విమానం నడిపే సమయంలో పైలట్ గంజాయి తీసుకున్నట్టు వెల్లడించింది.

ఈ ఘటనలో సాంకేతిక లోపం లేదా హైడ్రాలిక్ సమస్య ఉన్నదా అనే కోణంలోనూ దర్యాప్తు కొనసాగుతోంది. ప్రాథమిక విచారణలో విమానంలో నెగిటివ్ G (గురుత్వాకర్షణ) పరిస్థితి ఏర్పడిందని, సీట్ బెల్ట్ పెట్టుకోని ప్రయాణికులు, సిబ్బందికి గాయాలైనట్టు తేలింది. విమానం ఊగిసలాడుతున్న సమయంలో పైలట్ సీట్లో లేడనే ఆరోపణలు వినిపించాయి.

ప్రస్తుతం ఈ ఘటనపై సమగ్ర విచారణ కొనసాగుతోంది. టర్బులైన్స్‌కు సంబంధించిన సాంకేతిక లోపాలు, హైడ్రాలిక్ సమస్యలపై కూడా అధికారులు దర్యాప్తు చేస్తున్నారు.