ఎయిర్ ఇండియా విమానంలో టర్బులెన్స్: పైలట్ మద్యం సేవించినట్లు టెస్ట్‌లో తేలింది, ఇద్దరు డీ-రోస్టర్

ఆగస్టు 4న ఎయిర్ ఇండియా AI2379 విమానం ఫుకెట్ నుంచి ఢిల్లీకి ప్రయాణిస్తుండగా తీవ్ర టర్బులెన్స్‌కు గురై 300 అడుగుల మేర కిందకు దిగజారింది. ఈ ఘటనలో 17 మంది గాయపడ్డారు. తాజాగా ఈ విమానం పైలట్లపై మద్యం పరీక్ష నిర్వహించగా ఒక పైలట్ మద్యం సేవించినట్లు నిర్ధారణ అయ్యింది.

సంబంధిత వర్గాల సమాచారం ప్రకారం, విమానం ఢిల్లీ ఐజీఐ విమానాశ్రయంలో దిగిన వెంటనే ప్రామాణిక విధానం (SOP) ప్రకారం పైలట్లకు ఆల్కహాల్ టెస్ట్ చేయగా, ఒక పైలట్ టెస్టులో పాజిటివ్ వచ్చింది. ఫలితంగా ఇద్దరు పైలట్లను విధుల నుంచి తొలగించి (డీ-రోస్టర్) విచారణ పూర్తయ్యే వరకు నిషేధించారు.

డీజీసీఏ (DGCA) ఈ ఘటనపై విచారణ జరుపుతోంది. విచారణ ఫలితాల ఆధారంగా ఎయిర్‌క్రాఫ్ట్ ప్రమాదదర్యాప్తు సంస్థ (AAIB)కు కేసును బదిలీ చేస్తారా లేదా అనేది నిర్ణయిస్తారు. ఆగస్టు 4న సంభవించిన ఈ ప్రమాదంలో 13 మంది ప్రయాణికులు, నలుగురు సిబ్బంది గాయపడ్డారు. గాయపడిన ప్రయాణికులందరినీ ఆసుపత్రి నుంచి డిశ్చార్జ్ చేయగా, నలుగురు సిబ్బందికి చికిత్స కొనసాగుతోంది.

ఎయిర్‌లైన్స్ నిబంధనల ప్రకారం విమానం నడిపే పైలట్లు 12 గంటల ముందు నుంచి మద్యం సేవించరాదు. అయితే ఈ సంఘటనలో పైలట్ మద్యం సేవించినట్లు తేలడంతో అదే టర్బులెన్స్‌కు కారణమా అనే కోణంలో విచారణ సాగుతోంది. ఎయిర్ ఇండియా మాత్రం పైలట్లపై మద్యం పరీక్ష జరిగినట్లు మాత్రమే ధ్రువీకరించి, దాని ఫలితాలు తమకు తెలియదని పేర్కొంది. ఈ ఘటనపై పూర్తి విచారణ జరిపే వరకు ఎటువంటి తుది నిర్ణయం తీసుకోమని అధికారులు తెలిపారు.