ఆన్‌లైన్ మెడిసిన్ అమ్మకాలకు వ్యతిరేకంగా ఏలూరులో మెడికల్ షాప్‌లు బంద్

ఆన్‌లైన్ మెడిసిన్ అమ్మకాలను నిలిపివేయాలని డిమాండ్ చేస్తూ అఖిల భారత కెమిస్ట్ సమాఖ్య దేశవ్యాప్త బంద్‌కు పిలుపునిచ్చింది. దీంతో ఏలూరు జిల్లా వ్యాప్తంగా మెడికల్ షాప్‌లు మూతపడ్డాయి. సమాఖ్య సభ్యులు నల్ల బ్యాడ్జిలు ధరించి నిరసన కొనసాగించారు.

ఏలూరులో సుమారు 2,000 కెమిస్ట్ కుటుంబాలు ఈ రంగంపై ఆధారపడి జీవిస్తున్నాయని సమాఖ్య తెలిపింది. వారికి సహాయంగా పనిచేసే సిబ్బంది 2,500 మంది వరకు ఉన్నారు. జాతీయ స్థాయిలో 12 లక్షల కుటుంబాలు, అంటే సుమారు 5 కోట్ల మంది ఈ రంగంపై ఆధారపడుతున్నారని సమాఖ్య వక్తలు తెలిపారు.

ఆన్‌లైన్ అమ్మకాల వల్ల యాంటీబయోటిక్స్ నియంత్రణ లేకుండా లభ్యమవుతాయని, నాణ్యత లోపం గల మందులు చేరే ప్రమాదం ఉందని సమాఖ్య వాదిస్తోంది. భారత రాజ్యాంగంలోని ఆర్టికల్ 47 ప్రకారం ప్రజారోగ్య పరిరక్షణ కేంద్ర ప్రభుత్వ బాధ్యత అని, ఈకామర్స్ సంస్థల ద్వారా జరిగే అమ్మకాలను నియంత్రించడం లేదని సమాఖ్య అభిప్రాయపడింది.

ప్రస్తుతం Drugs and Cosmetics Act కింద DPCO నిబంధనల ప్రకారం షుగర్, BP, థైరాయిడ్ వంటి దీర్ఘకాలిక వ్యాధుల మందులపై ధర నియంత్రణ ఉందని, కేంద్రం అనుమతి లేకుండా ధర పెంచే అవకాశం లేదని సమాఖ్య ప్రతినిధులు వివరించారు. ఆన్‌లైన్ విక్రయాలు మాత్రమే జరిగితే భవిష్యత్తులో ధర నియంత్రణ ప్రమాదంలో పడుతుందని వారు ఆందోళన వ్యక్తం చేశారు.