భోగాపురం ఎయిర్‌పోర్ట్ రాకతో రియల్ ఎస్టేట్‌లో 30-40% ధరల పెరుగుదల

భోగాపురం వద్ద నిర్మాణంలో ఉన్న అల్లూరి సీతారామరాజు అంతర్జాతీయ విమానాశ్రయం రాకతో పరిసర ప్రాంతాల్లో రియల్ ఎస్టేట్ రంగం వేగంగా విస్తరిస్తోంది. గత కొన్ని నెలలతో పోలిస్తే భూముల ధరలు 30 నుంచి 40 శాతం వరకు పెరిగినట్లు స్థానికులు చెబుతున్నారు. క్రయ, విక్రయ లావాదేవీలు కూడా గణనీయంగా పెరిగాయి.

భోగాపురం సబ్‌ రిజిస్ట్రార్ కార్యాలయ పరిధిలో మొత్తం మూడు మండలాలు, 86 గ్రామాలు ఉన్నాయి. వాటిలో భోగాపురం మండలంలో 22 గ్రామాలు, డెంకాడ మండలంలో 27, పూసపాటిరేగ మండలంలో 37 గ్రామాలు ఉన్నట్లు ఆఫీస్ వర్గాలు తెలిపాయి. ఇటీవల ప్లాట్ బుకింగ్‌లు కూడా బాగా వస్తున్నాయని అధికారులు అన్నారు.

ఈ ఎయిర్‌పోర్ట్ కారణంగా ఉత్తరాంధ్ర అభివృద్ధి వేగవంతం అవుతుందని, భవిష్యత్తులో ధరలు మరింత పెరిగే అవకాశం ఉన్నట్లు స్థానిక రియల్టర్లు భావిస్తున్నారు. ప్రస్తుతానికి ఎయిర్‌పోర్ట్ నిర్మాణ పనులు కొనసాగుతున్నాయి.