ఆలూరు గ్రామంలో ప్లాస్టిక్ నిషేధం, ఉల్లంఘిస్తే రూ.5,000 జరిమానా

జగిత్యాల జిల్లా ఆలూరు గ్రామంలో ప్లాస్టిక్ వినియోగాన్ని నిషేధిస్తూ గ్రామ పంచాయతీ కీలక నిర్ణయం తీసుకుంది. ఇకపై ఎవరైనా ప్లాస్టిక్ వాడితే రూ.5,000 జరిమానా విధిస్తామని ప్రకటించింది. ఈ నిబంధన అమలుకు వచ్చే నెల 15వ తేదీ వరకు గ్రామస్తులకు గడువు ఇచ్చారు.

ప్లాస్టిక్కు ప్రత్యామ్నాయంగా గ్రామంలో స్టీల్ బ్యాంక్ ఏర్పాటు చేస్తున్నారు. ఇందులో 500 ప్లేట్లు, 300 గ్లాసులు అందుబాటులో ఉంచనున్నారు. ఏ వేడుక జరిగినా ఈ సామగ్రిని ఉచితంగా తీసుకోవచ్చు. బయటి వారు వాడుకోవడానికి ఒక్కో వస్తువుకు రూ.4 అద్దెగా నిర్ణయించారు.

ఇస్తరాకులతో ఆకు ప్లేట్లు తయారు చేసేందుకు ఉపాధి కూలీలను ప్రోత్సహిస్తున్నారు. ఖాళీ సమయాల్లో వారు ఆకు ప్లేట్లు కుట్టడం ద్వారా అదనపు ఆదాయం పొందవచ్చు. ప్లాస్టిక్ కాలుష్యం వల్ల క్యాన్సర్ వంటి వ్యాధులు పెరుగుతున్న తీవ్రతను గుర్తించి, గ్రామాన్ని పూర్తిగా ప్లాస్టిక్ రహితంగా మార్చాలని పంచాయతీ నిర్ణయించినట్లు ప్రతినిధులు తెలిపారు.