గోషామహల్‌లో నూతన ఉస్మానియా ఆస్పత్రి నిర్మాణ పనులను పరిశీలించిన మంత్రి పొన్నం ప్రభాకర్

హైదరాబాద్ గోషామహల్‌లో నిర్మిస్తున్న నూతన ఉస్మానియా జనరల్ ఆస్పత్రి నిర్మాణ పనులను మంత్రి పొన్నం ప్రభాకర్ శుక్రవారం పరిశీలించారు. ఆస్పత్రి మోడల్ డిజైన్లను పరిశీలించి, నిర్మాణ పనుల పురోగతిపై అధికారులను అడిగి తెలుసుకున్నారు. పనులు ఆలస్యం అవుతున్నందుకు అసంతృప్తి వ్యక్తం చేసిన మంత్రి, నిర్మాణాన్ని వేగవంతం చేయాలని అధికారులను ఆదేశించారు.

ఈ ఆస్పత్రిని 2,700 కోట్ల రూపాయల వ్యయంతో 2,000 పడకల సామర్థ్యంతో నిర్మిస్తున్నారు. 31 లక్షల చదరపు అడుగుల విస్తీర్ణంలో భవన నిర్మాణం జరుగుతున్నది. భవిష్యత్తులో వంద సంవత్సరాల అవసరాలకు అనుగుణంగా ఆధునిక సదుపాయాలతో ఈ ఆస్పత్రిని తీర్చిదిద్దుతున్నట్లు మంత్రి తెలిపారు. ముఖ్యమంత్రి రేవంత్ రెడ్డి సూచనల మేరకు ఈ నిర్మాణం చేపట్టినట్లు పొన్నం ప్రభాకర్ వెల్లడించారు.

ఇప్పటికే పైలింగ్ పనులు పూర్తయి, రెండు అంతస్తుల స్లాబులు వేయడం పూర్తైనట్లు మంత్రి తెలిపారు. ఇకపై ప్రతి నెలా నిర్మాణ పనులను సమీక్షిస్తామని ప్రకటించారు. 2,000 పడకల ఆస్పత్రితో పాటు విద్యార్థులకు వేర్వేరు హాస్టల్ భవనాలు, ధర్మశాల, అడ్మినిస్ట్రేటివ్ బిల్డింగ్, అన్ని రకాల ఆధునిక సదుపాయాలు, మంచి వెంటిలేషన్, గ్రీనరీ కల్పిస్తామని వివరించారు.

ఉస్మానియా ఆస్పత్రిని హెరిటేజ్‌గా కాపాడుతూ పక్కన ఉన్న గోషామహల్ పోలీస్ స్టేషన్ ప్రాంతాన్ని కూడా కలుపుకొని పెద్ద ఆస్పత్రి నిర్మించాలని ముఖ్యమంత్రి నిర్ణయించారని పొన్నం ప్రభాకర్ అన్నారు. నిజాం నవాబుల కాలంలో నిర్మించిన ఆస్పత్రిని నేడు మళ్ళీ పేద ప్రజలందరికీ ఉపయోగపడే విధంగా కట్టడం చారిత్రాత్మకమని ఆయన అభివర్ణించారు.

భూ సేకరణకు సంబంధించిన కొన్ని చిన్న సమస్యలు ఉన్నాయని, ఆస్పత్రికి నాలుగు వైపులా విశాలమైన రోడ్లు ఉండాలని, కనెక్టివిటీకి ఎలాంటి ఇబ్బంది లేకుండా చేస్తామని మంత్రి చెప్పారు. ఫీమేల్ హాస్టల్ నిర్మాణానికి సంబంధించి హెరిటేజ్ విషయంలో చిన్న చట్టపరమైన అంశాలు తలెత్తాయని, వాటన్నిటినీ పరిష్కరిస్తామని హామీ ఇచ్చారు.

ఇదే సందర్భంగా నగరంలో భూగర్భ జల సంరక్షణపై మంత్రి స్పందించారు. నిర్మాణంలో STP వ్యవస్థలు, వాటర్ హార్వెస్టింగ్ తప్పనిసరి చేయాలని సూచించారు. హైదరాబాద్ నగరంలో వర్షపు నీటిని భూమిలో ఇంకించేలా ప్రజలు సహకరించాలని విజ్ఞప్తి చేశారు. గోదావరి, కృష్ణా నీళ్లు ఎంత తీసుకొచ్చినా భూగర్భ జలాల పునరుద్ధరణ లేకుండా ప్రజలకు నీటి సమస్య తీరదని హెచ్చరించారు.