ఖమ్మం, భద్రాద్రి కొత్తగూడెంలో భారీ వర్షాలు: రెడ్ అలర్ట్, పాఠశాలలకు సెలవు

తుఫాను ప్రభావంతో ఉమ్మడి ఖమ్మం జిల్లాలో భారీ వర్షాలు కురుస్తున్నాయి. ఖమ్మం, భద్రాద్రి కొత్తగూడెం జిల్లాలకు వాతావరణ శాఖ రెడ్ అలర్ట్ ప్రకటించింది. భారీ వర్షాలు కురిసే అవకాశం ఉందని హెచ్చరిక జారీ చేసింది.

అశ్వారావుపేట, ములకలపల్లి, దమ్మపేట, సత్తుపల్లి, వేంసూరు, కల్లూరు ప్రాంతాల్లో వర్ష ప్రభావం ఎక్కువగా ఉంది. ఈ ప్రాంతాలు కోస్తా ఆంధ్ర సరిహద్దుకు దగ్గరగా ఉన్నాయి. మిగిలిన ప్రాంతాల్లోనూ ఉదయం నుంచి వర్షాలు కురుస్తున్నాయి. చల్లని గాలుల తీవ్రతతో వృద్ధులు, చిన్నారులు ఇబ్బందులు పడుతున్నారు.

భద్రాద్రి కొత్తగూడెం జిల్లాలోని అన్ని ప్రభుత్వ, ప్రైవేట్ విద్యాసంస్థలకు జిల్లా కలెక్టర్ సెలవు ప్రకటించారు. ఖమ్మం, కొత్తగూడెం కలెక్టరేట్లలో కంట్రోల్ రూమ్‌లు ఏర్పాటు చేశారు. కలెక్టర్లు పరిస్థితిని నిరంతరం పర్యవేక్షిస్తున్నారు. వాతావరణ శాఖ, అధికారుల సూచనలను తప్పనిసరిగా పాటించాలని వారు చెప్పారు.

గత కొన్ని రోజుల వరకు ఈ జిల్లాల్లో వర్షాభావ పరిస్థితి ఉండేది. తీవ్ర వర్షపాత లోటుతో రాష్ట్ర ప్రభుత్వం కరువు మండలాలను ప్రకటించింది. ఖమ్మం, భద్రాద్రి కొత్తగూడెం జిల్లాల్లోని పలు మండలాలు ఆ జాబితాలో ఉన్నాయి. భూగర్భ జలాలు, రిజర్వాయర్లు, చెరువుల్లో నీటిమట్టం తగ్గింది. తాగునీటి ఎద్దడి ఏర్పడుతుందన్న ఆందోళన నెలకొంది. ఇప్పుడు కురుస్తున్న వర్షాలతో కొంత ఉపశమనం ఉంటుందని భావిస్తున్నారు.

కానీ రైతులకు ఈ వర్షాలు నష్టాన్ని మిగులుస్తున్నాయి. ఖమ్మం జిల్లాలో గత వారం నుంచి వరి కోతలు ముమ్మరంగా జరుగుతున్నాయి. ఈదురుగాలుల తీవ్రతతో పంట నేలకొరిగింది. కళ్లాల్లో ఉన్న ధాన్యం తడిసే ప్రమాదం ఉంది. మిర్చి, పత్తి పంటలకూ ఇదే పరిస్థితి. తడి ధాన్యంలో తేమ శాతం పెరిగి మద్దతు ధర తగ్గే అవకాశం ఉందని రైతులు ఆందోళన చెందుతున్నారు.

ఈరోజు కూడా భారీ వర్ష సూచన ఉంది. రేపు, ఎల్లుండి కూడా తుఫాను ప్రభావం కొనసాగుతుందని అధికారులు చెప్తున్నారు. తుఫాను తీవ్రత తగ్గిన తర్వాత పంట నష్టాన్ని అంచనా వేసే అవకాశం ఉంది.