జూబ్లీ హిల్స్‌లో తాగునీటి వృధాపై ₹5,000 జరిమానా విధించిన జలమండలి

హైదరాబాద్‌లోని జూబ్లీ హిల్స్‌లో తాగునీటిని వృధా చేసిన ఓ నివాసానికి జలమండలి ₹5,000 జరిమానా విధించింది. రోడ్ నెంబర్ 57లోని ఫ్లాట్ నంబర్ 1152లో ఈ చర్య తీసుకున్నారు.

ఇంటి ప్రాంగణాన్ని శుభ్రం చేసేందుకు తాగునీటిని వాడుతున్నట్లు స్థానికులు WhatsApp ద్వారా జలమండలికి ఫిర్యాదు చేశారు. ఫిర్యాదు అందిన వెంటనే అధికారులు ఆ ఇంటికి వెళ్లి క్షేత్రస్థాయిలో పరిశీలన చేశారు. తాగునీటి దుర్వినియోగం జరిగినట్లు నిర్ధారించిన తర్వాత జరిమానా విధించారు.

తాగునీటిని తాగడానికి, గృహ అవసరాలకు మాత్రమే పొదుపుగా వాడాలని జలమండలి సూచించింది. ఇళ్లు, రోడ్లు శుభ్రం చేయడానికి తాగునీటిని వృధా చేస్తే చర్యలు తప్పవని హెచ్చరించింది.

నీటి వృధా కనిపిస్తే ఫోటోలు, వీడియోలతో జలమండలి WhatsApp నంబర్‌కు లేదా కస్టమర్ కేర్ నంబర్‌కు ఫిర్యాదు చేయాలని కోరింది. ఫిర్యాదు చేసిన వారి వివరాలను గోప్యంగా ఉంచుతామని స్పష్టం చేసింది.

తాగునీటి సంరక్షణలో ప్రతి ఒక్కరూ భాగస్వాములు కావాలని జలమండలి పిలుపునిచ్చింది.