ఆర్నాబ్ తుఫాను ప్రభావం: ఉప్పాడ తీరంలో కెరటాలు రోడ్డుపైకి, రోడ్డుకు గండి

ఆర్నాబ్ తుఫాను ప్రభావంతో ఉప్పాడ తీర ప్రాంతంలో సముద్రం ఉప్పొంగింది. సముద్రపు కెరటాలు బీచ్ రోడ్డుపైకి చొచ్చుకొచ్చాయి. పిఠాపురం నియోజకవర్గం ఉప్పాడ బీచ్ వద్ద పరిస్థితి తీవ్రంగా ఉంది.

తుఫాను ఈరోజు ఒకటి నుంచి రెండు గంటల్లో తీరం దాటే అవకాశం ఉందని వాతావరణ శాఖ తెలిపింది. తుఫాను కేంద్రం కాకినాడకు దాదాపు 20 కిలోమీటర్ల దూరంలో ఉందని, యానాం సమీపంలో తీరం దాటవచ్చని అధికారులు చెబుతున్నారు. నిన్నటి నుంచి భారీ వర్షం, ఈదురుగాలులు కొనసాగుతున్నాయి. పెద్ద చెట్లు, కరెంట్ స్తంభాలు నేలకొరిగాయి.

కొత్తపట్నం, మాయాపట్నం, కోనపాపుపేట, సుబ్బంపేట ప్రాంతాలు జలమయమయ్యాయి. కెరటాల ఉదృతికి బండరాళ్లు రోడ్డుపైకి వచ్చిపడ్డాయి. దీంతో రోడ్డు మధ్యలో గండి పడి రాకపోకలు నిలిచిపోయాయి. కొత్తపట్నం ప్రాంతంలో ఇళ్లలోకి సముద్రపు నీరు చేరింది.

రెవెన్యూ, పోలీసు శాఖలు ప్రజలను పునరావాస కేంద్రాలకు తరలించాయి. భోజనం, తాగునీరు అందిస్తున్నారు. సుమారు 20 లారీల బండరాళ్లు తెచ్చి JCB యంత్రాలతో రోడ్డుపై సర్దారు. రెండు క్రేన్లు రాత్రి తెల్లవారుజాము వరకు పనిచేశాయి. 48 గంటల పాటు బయటికి రావద్దని అధికారులు హెచ్చరిస్తున్నారు.

నిన్నటి నుంచి విద్యుత్, మొబైల్ సిగ్నల్ సరిగా లేవని స్థానికులు చెబుతున్నారు. కెరటాలకు పడవలు కొట్టుకుపోయాయని, ఉప్పాడ బీచ్ రోడ్డులో దాదాపు 7 కిలోమీటర్ల మేర దెబ్బతిందని వారు తెలిపారు. 1996 తుఫాను తర్వాత ఇలాంటి పరిస్థితిని చూడలేదని ఆ గ్రామస్థులు అంటున్నారు. ఉప్పాడకు సముద్ర తీర రక్షణ గోడ నిర్మాణం నవంబర్‌లో ప్రారంభమవుతుందని ఉపముఖ్యమంత్రి పవన్ కల్యాణ్ హామీ ఇచ్చినట్టు వారు చెప్పారు. ఈ పనులు మరింత ముందుగా ప్రారంభించాలని స్థానికులు కోరుతున్నారు.