అర్ణబ్ తుఫాను ప్రభావం: కోనసీమలో భారీగా చెట్లు కూలి రోడ్లపై ట్రాఫిక్ స్తంభన

అర్ణబ్ తుఫాను ప్రభావంతో కోనసీమ జిల్లాలో భారీగా చెట్లు కూలిపోతున్నాయి. కొత్తపేట నియోజకవర్గం కండ్రిక ప్రాంతంలో రోడ్లపై పెద్ద సంఖ్యలో చెట్లు విరిగిపడ్డాయి. దీంతో ట్రాఫిక్ పూర్తిగా నిలిచిపోయింది.

నిన్నటి నుంచి కొనసాగుతున్న ఈదురుగాలుల వల్ల అనేక ప్రాంతాల్లో రాకపోకలు స్తంభించిపోయాయి. కండ్రిక నుంచి అమలాపురం వెళ్లే మార్గంలో ఎక్కడా స్పష్టమైన రహదారి లేదు. అర కిలోమీటర్ నుంచి ఒక కిలోమీటర్ దూరం వెళ్లినా మరో చెట్టు అడ్డంగా పడి ఉంది. రోడ్డు పక్కన ఉన్న కొన్ని ఇళ్లపై చెట్ల కొమ్మలు విరిగిపడి నష్టం జరిగినట్టు స్థానికులు చెప్తున్నారు.

"నిన్న మధ్యాహ్నం నుంచి తుఫాను ప్రభావం మొదలైంది. చెట్ల కొమ్మలు ఇళ్లపై పడ్డాయి. రాత్రంతా చాలా ఇబ్బందులు పడ్డాం, భయంగా గడిచింది" అని స్థానికులు తెలిపారు. గ్రామం లోపల కూడా చెట్లు కూలిపోయాయని వారు చెప్పారు.

తుఫాను పూర్తిగా తగ్గే వరకు ప్రజలు సురక్షిత ప్రాంతాల్లో ఉండాలని ప్రభుత్వం హెచ్చరిస్తోంది. చెట్ల కింద నిలబడవద్దని, ప్రయాణాలను వాయిదా వేసుకోవాలని సూచిస్తోంది. ప్రస్తుతం కోనసీమలో వర్షం కొంత తగ్గుముఖం పట్టినా, గాలుల తీవ్రత కొనసాగుతోంది. కూలిపోతున్న చెట్ల వల్ల ప్రమాదాలు జరుగుతున్నట్టు స్థానికులు చెబుతున్నారు.