ISRO కొత్త ప్లాన్: 2029 నాటికి నాలుగు లాంచ్ ప్యాడ్లు, తమిళనాడులో కొత్త స్పేస్‌పోర్ట్

2029 నాటికి నాలుగు యాక్టివ్ లాంచ్ ప్యాడ్లను అందుబాటులోకి తీసుకురావాలని ఇస్రో లక్ష్యంగా పెట్టుకుంది. ప్రస్తుతం ఇస్రో రెండు లాంచ్ ప్యాడ్లతో ప్రయోగాలు చేస్తోంది. ఈ కొత్త రోడ్ మ్యాప్ వివరాలను ఇస్రో చైర్మన్ వి. నారాయణ తెలిపారు.

తమిళనాడులోని తూత్తుకుడి జిల్లా కులశేఖరపట్టణంలో దాదాపు 2,000 ఎకరాల విస్తీర్ణంలో కొత్త స్పేస్‌పోర్ట్ ఏర్పాటు చేయనున్నారు. ఇక్కడ స్మాల్ స్యాటెలైట్ లాంచ్ వెహికల్ (SSLV) ప్రయోగాలు జరుగుతాయి. ఈ కేంద్రంలో ఇంటిగ్రేషన్ భవనాలు, లాంచ్ ప్యాడ్లు, రైల్ ట్రాక్ వ్యవస్థలు, టెలిమెట్రీ ట్రాకింగ్ కమాండ్ సిస్టమ్స్ ఉంటాయని నారాయణ వివరించారు.

దేశీయ, అంతర్జాతీయ ఉపగ్రహ ప్రయోగాల డిమాండ్ పెరగడమే ఈ నిర్ణయానికి కారణమని ఆయన చెప్పారు. వాణిజ్య ప్రయోగాల కోసం ప్రైవేట్ సంస్థలతో భాగస్వామ్యానికి ఇస్రో ప్రాధాన్యం ఇస్తోంది. అయితే ఇస్రోను ఎట్టి పరిస్థితుల్లోనూ ప్రైవేటీకరించబోమని నారాయణ స్పష్టం చేశారు. స్టార్టప్‌లకు, ప్రైవేట్ పరిశ్రమలకు ఇస్రో సాంకేతిక పరిజ్ఞానాన్ని బదిలీ చేస్తుందని ఆయన తెలిపారు.

గగన్యాన్ మిషన్‌పై కూడా ఆయన వివరాలు ఇచ్చారు. రాబోయే రెండు నెలల్లో మొదటి మానవ రహిత గగన్యాన్ ప్రయోగం జరుగుతుంది. మూడు విడతల్లో ప్రయోగాలను పూర్తి చేసిన తర్వాత మానవ సహిత మిషన్‌కు వెళ్తామని ఆయన చెప్పారు. ఈ మిషన్ కోసం ఇప్పటికే దాదాపు 8,000 గ్రౌండ్ బేస్డ్ ప్రయోగాలు పూర్తయ్యాయి. ఎంపికైన నలుగురు వ్యోమగాములకు ప్రస్తుతం ప్రత్యేక శిక్షణ ఇస్తున్నారు.

జపాన్ అంతరిక్ష సంస్థతో కలిసి చంద్రయాన్-5 మిషన్ చేపడుతున్నట్టు నారాయణ తెలిపారు. ఈ మిషన్‌లో 350 కిలోల బరువున్న రోవర్‌ను చంద్రుడిపైకి పంపనున్నారు. ఈ రోవర్ చంద్రుని ఉపరితలంపై సుమారు 100 రోజుల పాటు ప్రయోగాలు చేస్తుంది.