దివిటిపల్లిలో అమరరాజా సెల్ తయారీ కేంద్రం ప్రారంభం

మహబూబ్నగర్ జిల్లా దివిటిపల్లిలో అమరరాజా సెల్ తయారీ కేంద్రాన్ని సీఎం రేవంత్ రెడ్డి ప్రారంభించారు. ఈ కేంద్రం ఈవీ వాహనాల బ్యాటరీలను ఉత్పత్తి చేస్తుంది. ప్రారంభంలో 700 మందికి ఉద్యోగాలు లభించగా, అందులో 400 మంది మహిళలు ఉన్నారు.

ఈ సందర్భంగా సీఎం రేవంత్ రెడ్డి మాట్లాడుతూ, వాహన కాలుష్యం తగ్గించడానికి ఈవీ బ్యాటరీల ఉత్పత్తి కీలకమన్నారు. కాలుష్యం లేని దేశంగా తీర్చిదిద్దడమే లక్ష్యమని, వాతావరణ మార్పుల నేపథ్యంలో ఎలక్ట్రిక్ వాహనాల వినియోగం పెంచాల్సిన అవసరం ఉందన్నారు.

తెలంగాణ రాష్ట్రం 2047 నాటికి 30 ట్రిలియన్ డాలర్ల జాతీయ జీడీపీకి 10 శాతం సహకారం అందించాలని లక్ష్యంగా పెట్టుకుందని సీఎం తెలిపారు. 2034 నాటికి రాష్ట్ర ఆర్థిక వ్యవస్థ 1 ట్రిలియన్ డాలర్లకు చేరాలని లక్ష్యం. రీజనల్ రింగ్ రోడ్డు ప్రాజెక్టుతో 10,000 చదరపు కిలోమీటర్ల ఏరియాలో పారిశ్రామిక జోన్లు, తయారీ యూనిట్లు ఏర్పాటు చేస్తామన్నారు.

తమ ప్రభుత్వం రూపొందించిన ఎనర్జీ, పారిశ్రామిక, టూరిజం, ఆరోగ్య, ఎగుమతి పాలసీలతో తెలంగాణ వేగంగా అభివృద్ధి చెందుతోందని సీఎం పేర్కొన్నారు. గత ప్రభుత్వాల మంచి విధానాలను కొనసాగిస్తూ వాటిని మరింత మెరుగుపరిచామని అన్నారు. అమరరాజా సంస్థ ప్రాంతీయ యువతకు ఉద్యోగాలు ఇవ్వాలని విజ్ఞప్తి చేశారు. జిల్లా ప్రజలు కష్టపడే స్వభావం కలవారని, పరిశ్రమ అభివృద్ధికి సంపూర్ణ సహకారం అందిస్తారని అన్నారు.

పాలమూరు-రంగారెడ్డి ఎత్తిపోతల, డిండి ప్రాజెక్టులకు కేంద్రం, ఆంధ్రప్రదేశ్ ప్రభుత్వాల నుంచి అనుమతులు తీసుకురావడానికి ప్రయత్నాలు జరుగుతున్నాయని సీఎం చెప్పారు. ఈ ప్రాజెక్టులు పూర్తయితే జిల్లా రైతాంగానికి సాగునీరు అందుతుందన్నారు.