అమరావతి ఐ రీ-టెండర్లకు క్యాబినెట్ ఆమోదం, ఇన్వెస్టర్లకు అదనపు రాయితీలు

అమరావతిలో ప్రతిపాదిత అమరావతి ఐ ప్రాజెక్టుకు సంబంధించి రీ-టెండర్లు పిలవడానికి ఆంధ్రప్రదేశ్ క్యాబినెట్ ఆమోదం తెలిపింది. లండన్ లోని లండన్ ఐ తరహాలో కృష్ణా నది తీరంలో ఈ ప్రాజెక్టు నిర్మించాలని ప్రభుత్వం గతంలోనే నిర్ణయించింది.

గతంలో టెండర్లు పిలిచినా పెట్టుబడిదారులు ముందుకు రాలేదు. వ్యాపారపరంగా లాభదాయకం కాదనే కారణంతో ఇన్వెస్టర్లు వెనక్కి తగ్గినట్టు సమాచారం. ఈ నేపథ్యంలో ప్రాజెక్టుకు వైబిలిటీ గ్యాప్ ఫండ్ ఇవ్వాలని, అదనపు రాయితీలు కల్పించాలని క్యాబినెట్ నిర్ణయించింది.

క్యాబినెట్ ఆమోదించిన కొత్త ప్రోత్సాహకాల ప్రకారం, అమరావతి ఐ ఎత్తును బట్టి డెవలపర్లకు అదనపు భూమిని వాణిజ్య వినియోగానికి అందిస్తారు. 128 నుంచి 175 మీటర్ల ఎత్తు వరకు ఆరు ఎకరాలు, 175 నుంచి 200 మీటర్లకు ఎనిమిది ఎకరాలు, 200-250 మీటర్లకు నాలుగు ఎకరాలు, 250 మీటర్లపైబడి ఉంటే ఐదు ఎకరాలు అదనంగా ఇవ్వనున్నారు. అయితే ప్రతి సందర్భంలోనూ ఐదు ఎకరాల్లో గ్రీన్ డెవలప్మెంట్ తప్పనిసరి.

సవరించిన టెండర్లు, వైబిలిటీ గ్యాప్ ఫండ్, అదనపు భూమి రాయితీలతో ఈసారి ఇన్వెస్టర్ల నుంచి ఆసక్తి పెరుగుతుందని ప్రభుత్వం ఆశిస్తోంది. టెండర్ల సమయం, ఇతర వివరాలు త్వరలో ప్రకటించే అవకాశం ఉంది.