అమరావతిలో మంత్రుల పరిశీలన.. నెలాఖరుకు ఎమ్మెల్యే, మంత్రుల నివాసాలు సిద్ధం

అమరావతిలో జరుగుతున్న నిర్మాణ పనులను హోంమంత్రి వంగలపూడి అనిత, మునిసిపల్ శాఖ మంత్రి నారాయణ, రెవెన్యూ శాఖ మంత్రి కొండపల్లి శ్రీనివాస్ సోమవారం సందర్శించారు. వీరు రోడ్లు, భవనాలతో పాటు జీఐడీ టవర్స్, ఎమ్మెల్యే, ఎమ్మెల్సీ క్వార్టర్స్, మంత్రుల నివాసాల నిర్మాణ పనులను పరిశీలించారు.

ఈ సందర్భంగా మంత్రి నారాయణ సహచర మంత్రులకు నిర్మాణం ఏ తీరున కొనసాగుతోందో వివరించారు. అమరావతి భవిష్యత్తు రాజధానిగా రూపుదిద్దుకుంటోందని, ఇక్కడి నిర్మాణాలు ఆంధ్రప్రదేశ్ భవిష్యత్తుకు అద్దం పడతాయని హోంమంత్రి అనిత వ్యాఖ్యానించారు.

నిర్మాణ పురోగతిపై విపక్షాల నుంచి వస్తోన్న విమర్శలను ప్రస్తావిస్తూ, విమర్శ చేస్తున్న వైసీపీ నేతలు అమరావతికి వచ్చి స్వయంగా పనులు చూడాలని కోరారు. "నెలాఖరు నాటికి ఎమ్మెల్యే, మంత్రుల నివాసాలను అప్పగిస్తాం. డిసెంబర్ కల్లా సుమారు 4000 మందికి ఇళ్ల పంపిణీ చేస్తాం," అని ఆమె తెలిపారు. ఇప్పటికే ఇక్కడ నిర్మించిన ఐకానిక్ భవనాలు, ఇతర నిర్మాణాలను ప్రత్యక్షంగా చూస్తే స్పష్టత వస్తుందని అన్నారు.