అమరావతి రైల్వే లైన్, ఇన్నర్ రింగ్ రోడ్‌కు రైతుల అంగీకారం: మంత్రి నారాయణ

అమరావతి రాజధాని ప్రాంతంలో రైల్వే లైన్, ఇన్నర్ రింగ్ రోడ్ ప్రాజెక్టుల కోసం భూ సేకరణ విషయంలో రైతులు సానుకూలంగా స్పందించారు. గుంటూరు జిల్లా కలెక్టరేట్లో మంత్రి నారాయణ రైతులతో సమావేశమయ్యారు.

ఈ సమావేశంలో తాడికొండ, మోతడక గ్రామాల రైతులంతా హాజరయ్యారు. కంతేరు గ్రామం నుండి కొంతమంది రైతులు మాత్రమే వచ్చారు. పూర్తి స్థానిక అంగీకారంతోనే భూములు సేకరిస్తామని మంత్రి స్పష్టం చేశారు. కంతేరులో త్వరలో గ్రామసభ నిర్వహించి అందరి సమ్మతి తీసుకుంటామన్నారు.

రాజధాని విమానాశ్రయం విషయంపై ఆగస్టు 21న క్యాబినెట్ సమావేశంలో చర్చిస్తామని మంత్రి నారాయణ వెల్లడించారు.

రైతులు కొన్ని సూచనలు చేశారు. భూమి నింపటం ఆరు నెలల నుంచి ఏడాదిలోపు పూర్తి చేయాలని, భూ సేకరణ వెంటనే చేపట్టాలని కోరారు. ప్రాజెక్ట్ ఆలస్యం కాకుండా 2029 నాటికి కొన్ని రోడ్లు పూర్తి చేయాలని కోరారు. మొదట రెండు లైన్ల రోడ్లు వేసి, ఆపై విద్యుత్ లైన్లు, ప్లాట్ల అభివృద్ధి చేపట్టాలని సూచించారు.

ఈ విధానాన్ని ఆమోదిస్తూ, రైతుల డిమాండ్లను స్వాగతించినట్లు మంత్రి నారాయణ తెలిపారు. ముఖ్యమంత్రికి ఈ విషయం చెప్పామని, తప్పకుండా అమలు చేస్తామని హామీ ఇచ్చారు.