అమరావతిలో 13న సీడ్ యాక్సెస్ రోడ్డు, హైరైజ్ టవర్ల ప్రారంభం

అమరావతిలో సీడ్ యాక్సెస్ రోడ్డు, ప్రజాప్రతినిధుల హైరైజ్ టవర్లను ఈ నెల 13న ముఖ్యమంత్రి చంద్రబాబు నాయుడు ప్రారంభించనున్నారు. ఈ కార్యక్రమం కోసం సీఆర్డీఏ అధికారులు ఏర్పాట్లు వేగవంతం చేశారు.

18.27 కి.మీ. పొడవైన ఈ సీడ్ యాక్సెస్ రోడ్డు 9 వరుసలతో రూపొందించబడింది. దొండపాడు నుంచి విజయవాడ-మంగళగిరి రహదారిని కలుపుతుంది. బకింగ్హామ్ కాలువ, గుంటూరు ఛానల్‌పై నిర్మించిన స్టీల్ బ్రిడ్జిలను సీఎం మొదట ప్రారంభించి, ఆ తర్వాత రోడ్డు మీదుగా ప్రజాప్రతినిధుల టవర్ల వద్దకు చేరుకుంటారు.

ఎమ్మెల్యేలకు 6 టవర్లు, ఎమ్మెల్సీలకు 3 టవర్లు ఏర్పాటు చేశారు. వీటిలో మొత్తం 207 అత్యాధునిక ఫ్లాట్లు సిద్ధంగా ఉన్నాయి. టవర్ల తాళాలను సీఆర్డీఏ అధికారులు సీఎంకు అందజేస్తారు. ఈ నెల 17 నుంచి ప్రారంభమయ్యే శాసనసభ వర్షాకాల సమావేశాల్లో ఫ్లాట్లను ప్రజాప్రతినిధులకు కేటాయించే అవకాశం ఉంది.

సీడ్ యాక్సెస్ రోడ్డును భవిష్యత్తులో మణిపాల్ ఆస్పత్రి వరకు విస్తరించే ప్రణాళికలు ఉన్నాయి. రాజధానిలోని ఉత్తర-దక్షిణ రహదారులను దీనికి అనుసంధానించనున్నారు. ఈ ప్రాజెక్టులతో పాలన వేగవంతంగా ప్రజలకు చేరుతుందని అధికారులు తెలిపారు.