దేశంలోనే తొలి పోల్-ఫ్రీ క్యాపిటల్‌గా అమరావతి

దేశంలోనే విద్యుత్ స్తంభాలు లేని తొలి రాజధాని నగరంగా అమరావతి రూపుదిద్దుకుంటోంది. అన్ని యుటిలిటీ సేవలను—విద్యుత్ లైన్లు, ఆప్టికల్ ఫైబర్ కేబుళ్లు, తాగునీటి పైపులు, గ్యాస్ పైపులు, మురుగునీటి వ్యవస్థలు—భూమి అడుగున ఏర్పాటు చేయడం ద్వారా నగరంలో ఎలాంటి విద్యుత్ స్తంభాలు ఉండవని అధికారులు తెలిపారు.

ఇందుకోసం ప్రత్యేకంగా కామన్ యుటిలిటీ కారిడార్ వ్యవస్థ నిర్మిస్తున్నారు. ఈ విధానం వల్ల రహదారులపై వేలాడే తీగల సమస్య ఉండదని, నగర అందం పెరుగుతుందని, తుఫాన్లు, భారీ వర్షాల సమయంలో విద్యుత్, కమ్యూనికేషన్ వ్యవస్థలకు నష్టం తగ్గుతుందని అధికార వర్గాలు చెబుతున్నాయి. అలాగే, విద్యుత్ స్తంభాలు లేకపోవడంతో చెట్ల నరికివేత గణనీయంగా తగ్గి పర్యావరణానికి మేలు జరుగుతుందని నిపుణులు అభిప్రాయపడుతున్నారు.

విద్యుత్ స్తంభాలు, వేలాడే వైర్లు లేని విశాలమైన రహదారులు, ఉత్తమ స్కై వ్యూ వంటి ఆధునిక మౌలిక సదుపాయాలతో అమరావతి కేవలం ఆంధ్రప్రదేశ్ రాజధానిగానే కాకుండా, దేశానికే ఆదర్శ నగరంగా అవతరిస్తోంది.