అమరావతికి ఉండవల్లి స్టీల్ బ్రిడ్జ్ సిద్ధం; ఆగస్టు 15న సీఎం ప్రారంభం

అమరావతి రాజధాని ప్రాంతానికి ప్రధాన ప్రవేశ మార్గాన్ని అందించే ఉండవల్లి స్టీల్ బ్రిడ్జ్ ఆగస్టు 15న ప్రారంభం కానుంది. ఏపీ సీఎం చంద్రబాబు నాయుడు ఈ బ్రిడ్జిని జాతికి అంకితం చేయనున్నారు. ప్రకాశం బ్యారేజీ సమీపంలో నిర్మించిన ఈ బ్రిడ్జి, బహింగం కెనాల్, గుంటూరు ఛానల్, కొండవీటి వాగు మూడింటిపై రెండు బ్రిడ్జిలతో కలిపి మొత్తం మూడు స్టీల్ నిర్మాణాలుగా సిద్ధమైంది.

ఇప్పటివరకు అమరావతి వెళ్లడానికి ఉన్న ఏకైక మార్గం ఉండవల్లి కరకట్ట (బండ్ రోడ్) మాత్రమే. ఇరుకైన ఈ రోడ్డుపై ఒకేసారి రెండు వాహనాలు వెళ్లడం కష్టంగా ఉండేది. సీఎం నివాసం, హైకోర్టు, సచివాలయం వైపు వెళ్లే అధికారులు, న్యాయవాదులు, ప్రజలు తీవ్ర రద్దీని ఎదుర్కొనేవారు. ఇప్పుడు ఈ స్టీల్ బ్రిడ్జి అందుబాటులోకి రావడంతో కరకట్టపై రాకపోకలు తగ్గి, ట్రాఫిక్ సమస్యకు పరిష్కారం లభిస్తుంది.

బ్రిడ్జి నిర్మాణానికి జిందాల్ స్టీల్స్ నుంచి 1300 టన్నుల స్టీల్ కొనుగోలు చేశారు. జనవరి చివర్లో పనులు ప్రారంభించి, సుమారు ఆరు నెలల్లో పూర్తి చేశారు. నిర్మాణంలో కొద్దిపాటి అలైన్మెంట్ సమస్య వచ్చినా, దాన్ని వెంటనే సరిచేశారు. మొత్తం ప్రాజెక్టును ఏపీ క్యాపిటల్ డెవలప్మెంట్ కార్పొరేషన్ పర్యవేక్షించింది. మంత్రి నారాయణతో పాటు అధికారులు రోజూ పనులను పర్యవేక్షిస్తూ, నాణ్యతపై ప్రత్యేక దృష్టి పెట్టారు.

ఈ బ్రిడ్జ్ ద్వారా నేరుగా సీడ్ యాక్సెస్ రోడ్డుకు చేరుకోవచ్చు. అక్కడి నుంచి హైకోర్టు, సచివాలయం, అసెంబ్లీ, సీఆర్డీఏ కార్యాలయాలకు సులభంగా వెళ్లే అవకాశం ఉంటుంది. ప్రస్తుతానికి ఒకే బ్రిడ్జి మీద టూ-వే ట్రాఫిక్ నడుస్తుంది; దాని పక్కనే మరో బ్రిడ్జి నిర్మాణంలో ఉంది, ఐదారు నెలల్లో ఆరంభం కానుంది. భారీ వాహనాలు కూడా ఈ బ్రిడ్జి మీద నడవడానికి తగినంత బలంగా దీన్ని తయారు చేశారని అధికారులు తెలిపారు.