అమర్నాథ్ మంచు శివలింగ దర్శన యాత్ర నేటి నుంచి ప్రారంభం

దక్షిణ కాశ్మీర్‌లోని హిమాలయాల్లో 3,880 మీటర్ల ఎత్తున ఉన్న అమర్నాథ్ గుహలో సహజంగా ఏర్పడిన మంచు శివలింగ దర్శన యాత్ర నేటి నుంచి మొదలైంది. 57 రోజుల పాటు కొనసాగే ఈ వార్షిక యాత్ర రక్షాబంధన్ రోజైన ఆగస్టు 28న ముగుస్తుంది.

జమ్మూలోని భగవతీనగర్ బేస్ క్యాంప్ నుంచి లెఫ్టినెంట్ గవర్నర్ మనోజ్ సింహా బల్తాల్ మార్గంలో తొలి బృందం యాత్రికుల కాన్వాయిని జెండా ఊపి ప్రారంభించారు. రాంబన్ జిల్లా చంద్రకోట్ వద్ద వారిని స్థానికులు, అధికారులు, లంగర్ సంస్థలు ఉచిత భోజనంతో సాదరంగా స్వాగతించారు.

యాత్ర సాఫీగా సాగేందుకు పోలీస్, ఆర్మీ, సిఏపిఎఫ్, ఎన్డిఆర్ఎఫ్, ట్రాఫిక్ పోలీస్, అగ్నిమాపక శాఖలతోపాటు ఆరోగ్య శాఖ బృందాలు సమన్వయంతో భద్రత, అత్యవసర సేవలు అందించే ఏర్పాట్లు చేశారు. ప్రతి ఏటా లక్షలాది మంది తరలివచ్చే ఈ యాత్ర రెండు మార్గాల్లో జరుగుతోంది: 48 కిలోమీటర్ల సంప్రదాయ పహల్గామ్ దారి, 14 కిలోమీటర్ల బల్తాల్ మార్గం.

ఇప్పటికే 3.5 లక్షల మందికి పైగా భక్తులు నమోదు చేసుకున్నారు. రద్దీ నియంత్రణ కోసం రోజువారి యాత్రికుల సంఖ్యపై అధికారులు పరిమితి విధించారు.