తెలంగాణలో నేడు ముసాయిదా ఓటరు జాబితా విడుదల; అభ్యంతరాలు దాఖలు చేసే అవకాశం

తెలంగాణలో సమగ్ర ఓటరు జాబితా సవరణ ప్రక్రియ కీలక దశకు చేరుకుంది. ఎన్నికల అధికారులు నేడు ముసాయిదా ఓటరు జాబితాను విడుదల చేయనున్నారు.

రాష్ట్రంలో మొత్తం 3,38,26,448 మంది ఓటర్లు ఉన్నట్లు అధికారులు తెలిపారు. వీరిలో 2,64,73,616 మంది ఓటర్ల నమోదు ఫారమ్‌ల డిజిటలైజేషన్ ఈ నెల 10వ తేదీ నాటికి పూర్తయింది.

మిగిలిన 73,52,832 మంది ఓటర్ల వివరాలు నమోదు కాలేదు. ఆచూకీ లేని వారు, శాశ్వతంగా వలస వెళ్లిన వారు, మరణించిన వారు, డూప్లికేట్ ఓటర్లు ఈ గ్రూపులో ఉన్నారు. వీరిని అన్‌కలెక్టబుల్ కేటగిరీలో చేర్చారు.

ముసాయిదా జాబితా విడుదల తర్వాత నియోజకవర్గాల వారీగా రాజకీయ పార్టీల ప్రతినిధులతో ఎన్నికల అధికారులు సమావేశాలు నిర్వహిస్తారు. జాబితాలో పేర్లు లేనివారు, వివరాల్లో తప్పులు ఉన్నవారు ఫిర్యాదులు చేయవచ్చు. దరఖాస్తుల స్వీకరణ నేటి నుంచి సెప్టెంబర్ 30 వరకు కొనసాగుతుంది. అభ్యంతరాల పరిష్కారం ఈ నెల 17 నుంచి అక్టోబర్ 15 వరకు జరుగుతుందని ఎన్నికల అధికారులు తెలిపారు.