అనంతపురంలో చీనీ తోటలు ఎండిపోతున్నాయి — రైతుల నష్టం కోట్లలో

అనంతపురం జిల్లాలో వరుసగా రెండేళ్లుగా వర్షాలు పడకపోవడంతో భూగర్భ జలాలు అడుగంటిపోయాయి. దీంతో జిల్లా వ్యాప్తంగా చీనీ మామిడి తోటలు ఎండిపోతున్నాయి.

గార్లదిన్నె మండలంలోని మార్తాడు, పెనకచల్ గ్రామాల పరిసర ప్రాంతాల్లో 5 నుంచి 8 సంవత్సరాల వయసున్న చీనీ తోటలు నాశనమవుతున్నాయి. ఒక్క గ్రామంలోనే సుమారు 1,000 ఎకరాల పంట ఎండిపోయిందని రైతులు చెప్తున్నారు. ఉమ్మడి అనంతపురం జిల్లాలో మొత్తం దాదాపు 95,000 ఎకరాల్లో చీనీ సాగు జరుగుతుంది. అందులో సింగనమల నియోజకవర్గంలో 45,000 ఎకరాలు, గార్లదిన్నె మండలంలో 19,000 ఎకరాలు ఉన్నాయి.

బోర్లు వేసినా నీళ్లు పడడం లేదు. ఒక్కో రైతు ఆరు నుంచి ఏడు బోర్లు వేశారు. ఒక్కో బోర్‌కు ₹70,000 నుంచి లక్ష రూపాయల వరకు ఖర్చు చేశారు. ఒక్కో రైతుకు బోర్ల మీద మాత్రమే ₹6 లక్షల వరకు ఖర్చైంది. ఇప్పుడు ట్యాంకర్ల ద్వారా నీళ్లు తోలుకుని తోటలు కాపాడుకునే ప్రయత్నం చేస్తున్నారు. ఒక్కో ట్యాంకర్‌కు ₹1,000 అవుతోంది. రోజుకు 10 ట్యాంకర్లు తోలుతే రోజుకు ₹10,000 ఖర్చు అవుతోంది. నెలకు ₹3 లక్షల వరకు ఖర్చు పెడుతున్నారు. రెండు నెలల నుంచి ఈ పరిస్థితి కొనసాగుతోంది.

చీనీ తోటలు పెట్టిన తొలి మూడేళ్లు ఎలాంటి ఆదాయం ఉండదు. నాలుగో సంవత్సరం నుంచి ఆదాయం వస్తుంది. ఎకరానికి ఏటా ₹1 లక్ష వరకు పెట్టుబడి అవుతుంది. ఇటీవల వరకు క్వింటాల్ చీనీ ₹20,000 లోపు పలికింది. ఇప్పుడు మంచి ధర ఉన్న వేళ తోటలు ఎండిపోతున్నాయని రైతులు వాపోతున్నారు.

ఎల్‌నినో ప్రభావం వల్ల ఈ ఏడాది సాధారణం కంటే తక్కువ వర్షపాతం నమోదవుతుందని వాతావరణ శాఖ నిపుణులు హెచ్చరించారు. రైతులు ప్రభుత్వం ట్యాంకర్ల ద్వారా చీనీ తోటలకు నీరందించాలని కోరుతున్నారు. అయితే ఈ విషయంపై ప్రభుత్వం స్పందన తెలియాల్సి ఉంది.