అనంతపురం కళాశాలలో రెండో అంతస్తు నుంచి పడిన విద్యార్థిని.. పరిస్థితి విషమం

అనంతపురంలోని KSN ప్రభుత్వ డిగ్రీ కళాశాలలో రెండో అంతస్తు నుంచి డిగ్రీ విద్యార్థిని కిందపడిపోయారు. ఆమెను అపస్మారక స్థితిలో ప్రభుత్వ ఆసుపత్రికి తరలించారు. పరిస్థితి విషమంగా ఉందని వైద్యులు తెలిపారు.

కళాశాలలో డిగ్రీ రెండో సంవత్సరం చదువుతున్న వసంత పడిపోయినట్లు స్టాఫ్ సభ్యులు ఫోన్ ద్వారా సమాచారం ఇచ్చారు. వెంటనే ఉపాధ్యాయులు, విద్యార్థులు అప్రమత్తమై ఆమెను ప్రభుత్వ ఆసుపత్రికి తీసుకెళ్లారు. ఆమెకు బయట ఎలాంటి గాయాలు కనిపించలేదు. నోటి నుంచి రక్తం రావడంతో లోపల గాయాలుంటాయని వైద్యులు భావిస్తున్నారు.

కోమా స్కోరు (GCS) సాధారణంగా 15 ఉంటుంది. ఈ విద్యార్థినికి 8 నమోదైంది. దీంతో ఆమె కోమాలో ఉన్నట్లు వైద్యులు తెలిపారు. ఆమెకు ఫిట్స్ కూడా వచ్చాయి. న్యూమోథొరాక్స్ ఉన్నట్లు, కడుపులో అవయవాలు దెబ్బతిని రక్తం లీక్ అయినట్లు ప్రాథమిక పరీక్షలో తెలిసింది.

వసంత స్వగ్రామం నార్పల మండలం బి పప్పూరు. గత నాలుగు రోజులుగా అనారోగ్యం కారణంగా ఆమె కళాశాలకు రాలేదని సమాచారం. ఆమె ఎలా కిందపడిందనే విషయంపై స్పష్టత లేదు. పోలీసులు కేసు నమోదు చేసి దర్యాప్తు చేపట్టారు.