అమెరికాలో నల్గొండ విద్యార్థిని శ్రీజా రెడ్డి.. 8 రోజులైనా ఆచూకీ లేదు

అమెరికాలో ఉన్నత చదువులు చదువుతున్న శ్రీజా రెడ్డి కనిపించకుండా పోయారు. ఆమె నల్గొండ జిల్లా కనగల్ మండలం శాబ్దుల్లాపురం గ్రామానికి చెందినవారు. ఈ నెల 2వ తేదీ నుంచి ఆమె ఆచూకీ లభించలేదు. ఎనిమిది రోజులు గడిచినా ఎలాంటి సమాచారం రాలేదు.

ఆగస్టు 2 సాయంత్రం తాను ఉంటున్న రూమ్ నుంచి వాకింగ్‌కు వెళ్తానని చెప్పి ఆమె బయటకు వెళ్లారు. తిరిగి రాకపోవడంతో రూమ్‌మేట్స్, స్నేహితులు స్థానిక పోలీసులకు ఫిర్యాదు చేశారు. పోలీసులు కేసు నమోదు చేసి విచారణ మొదలుపెట్టారు.

ఆమె ఫోన్ సిగ్నల్ రూమ్ నుంచి సుమారు అర కిలోమీటర్ దూరం వరకు మాత్రమే కనిపించిందని పోలీసులు గుర్తించారు. ఆ ప్రాంతంలో డ్రోన్లు, హెలికాప్టర్‌తో గాలింపు చేసినా ఆధారాలు లభించలేదు. స్నేహితులు తెలిపిన ప్రకారం ఆమె వాకింగ్‌కు వెళ్లిన ప్రాంతంలో బీచ్ ఉంది. కిడ్నాప్‌తో సహా అన్ని కోణాల్లో పోలీసులు దర్యాప్తు చేస్తున్నారు.

తల్లి రూప, తండ్రి యాదగిరి రెడ్డి కూతురు కోసం ఎదురుచూస్తున్నారు. ఆగస్టు 3 తెల్లవారుజామున అమెరికా పోలీసులు ఘటనాస్థలానికి చేరుకున్నారని యాదగిరి రెడ్డి తెలిపారు. తమ ఫిర్యాదుపై పోలీసులు ఆలస్యంగా స్పందిస్తున్నారని ఆయన ఆరోపించారు. రాఖీ పండుగకు ఆమె సొంతూరికి వచ్చి కుటుంబంతో గడిపిన సమయాన్ని తలుచుకుంటూ కుటుంబం కుమిలిపోతోంది.

రాష్ట్ర మంత్రి కోమటిరెడ్డి వెంకట్ రెడ్డి ఎంబసీతో మాట్లాడినట్లు కుటుంబం తెలిపింది. తల్లిదండ్రులకు ఆయన సమాచారం అందించారు. TANA సభ్యులు స్థానిక పోలీసులతో నిరంతరం సంప్రదింపులు జరిపేలా సూచించినట్లు కుటుంబం పేర్కొంది. నల్గొండ RDO అశోక్ రెడ్డి శనివారం గ్రామానికి వెళ్లి యాదగిరి రెడ్డిని పరామర్శించారు. ఘటన వివరాలు అడిగి తెలుసుకుని కుటుంబ సభ్యులను ఓదార్చారు.

కేంద్ర మంత్రులు కిషన్ రెడ్డి, బండి సంజయ్ ప్రత్యేక చొరవ తీసుకోవాలని తల్లిదండ్రులు కోరుతున్నారు. అమెరికా ప్రభుత్వం సంబంధిత అధికారులతో సంప్రదింపులు జరిపి కూతురిని క్షేమంగా స్వదేశానికి తీసుకురావాలని విజ్ఞప్తి చేస్తున్నారు.