హైదరాబాద్‌లో అక్రమ అండాల వ్యాపారం: 8 మంది అరెస్టు, కింగ్‌పిన్‌గా అమిత్ శర్మ

హైదరాబాద్‌లో అక్రమ అండాల వ్యాపారంపై పోలీసులు దర్యాప్తు చేపట్టారు. ఈ కేసులో గత నెలలో ఎనిమిది మందిని అరెస్టు చేశారు. ఈ నెట్‌వర్క్‌కు అమిత్ శర్మ కింగ్‌పిన్‌గా గుర్తించినట్టు పోలీసులు తెలిపారు.

ఎస్‌ఓటీ పోలీసులు మల్కాజగిరి, హైదరాబాద్ పోలీస్ కమిషనరేట్ పరిధుల్లో ఏకకాలంలో దాడులు నిర్వహించారు. ఒకే రోజులో రెండు అక్రమ ఫెర్టిలిటీ కేంద్రాలను గుర్తించారు. ఈ దాడుల్లో హార్మోన్ ఇంజెక్షన్లు, సిరంజీలు, సూదులు, టాబ్లెట్లు స్వాధీనం చేసుకున్నారు. మహిళల అండాలతో పాటు పురుషుల వీర్య కణాలను కూడా సేకరించి ఫెర్టిలిటీ కేంద్రాలకు విక్రయించినట్టు దర్యాప్తులో తేలింది.

అరెస్టు అయిన వారిలో IVF ఏజెంట్ రేష్మా ఖాతూన్, డోనర్ బ్యాంక్ మేనేజర్ జెఫ్రీ ప్రదీప్, మధ్యవర్తిగా వ్యవహరించిన పంకజ్ సోనీ ఉన్నారు. ఇప్పటివరకు 48 మంది మహిళలను ఈ వ్యవహారంలోకి లాగినట్టు దర్యాప్తులో వెల్లడైంది.

ఏజెంట్లు, మధ్యవర్తులు, డోనర్ బ్యాంకుల పేరుతో ఈ వ్యాపారం నడుస్తోంది. అండాలు ఇచ్చే మహిళలకు వేలల్లో చెల్లించి, వాటిని కొనుగోలు చేసేవారి నుంచి లక్షల్లో వసూలు చేస్తున్నట్టు సమాచారం. ఒడిశా, బీహార్, మహారాష్ట్ర నుంచి మొదలైన ఈ నెట్‌వర్క్ హైదరాబాద్ వరకు విస్తరించింది. మహారాష్ట్రలో ఒక మహిళ తన జీవితకాలంలో 45 సార్లు అండాలు దానం చేసిన ఘటన వెలుగులోకి వచ్చింది. నెలకు ₹20,000 వస్తాయన్న ఆశతో ఆమె ఈ పని చేసినట్టు తెలిసింది. చివరకు ఆమె ఆరోగ్యం ప్రమాదంలో పడింది.

అసిస్టెంట్ రీప్రొడక్టివ్ టెక్నాలజీ (ART) చట్టం ప్రకారం, అండాల దానం నమోదైన ART బ్యాంకుల ద్వారా నిర్దేశిత వైద్య విధానంలోనే జరగాలి. డోనర్‌కు నేరుగా డబ్బు చెల్లించి అండాలను కొనడం, అమ్మడం చట్టవిరుద్ధం. వైద్యుల పర్యవేక్షణ లేకుండా అండాలు సేకరించారా అన్నది ఇంకా తేలాల్సి ఉంది. ఈ ఎనిమిది మంది వెనుక పెద్ద నెట్‌వర్క్ ఉందని పోలీసులు అనుమానిస్తున్నారు. ఆర్థిక లావాదేవీలపై దర్యాప్తు కొనసాగుతోంది.