షేక్ హసీనా పాస్‌పోర్టు అభ్యర్థనను తిరస్కరించిన బంగ్లాదేశ్ ప్రభుత్వం

బంగ్లాదేశ్ మాజీ ప్రధాని షేక్ హసీనా కొత్త పాస్‌పోర్టు, జాతీయ గుర్తింపు కార్డు జారీ చేయాలని తన దేశ ప్రభుత్వాన్ని కోరారు. వచ్చే డిసెంబర్ నాటికి స్వదేశానికి తిరిగి వెళ్లాలనే లక్ష్యంతో ఈ అభ్యర్థన చేసినట్లు అవామీ లీగ్ వర్గాలు తెలిపాయి.

భారత్‌లోని బంగ్లాదేశ్ హై కమిషన్ ద్వారా, తన న్యాయ ప్రతినిధుల సహాయంతో హసీనా ఈ అభ్యర్థనను పంపినట్లు సమాచారం. ప్రస్తుతం ఆమె భారత్‌లో ఉంటున్నారు.

ఈ అభ్యర్థనను బంగ్లాదేశ్ ప్రభుత్వం తిరస్కరించింది. విదేశాంగ శాఖ సహాయ మంత్రి హుమయున్ కబీర్ దీన్ని రాజకీయ డ్రామా అని అన్నారు. ఉగ్రవాదులకు పాస్‌పోర్టులు జారీ చేసే ఆనవాయితీ తమ దేశంలో లేదని ఆయన చెప్పారు. హసీనాను వెంటనే భారత్ అప్పగించాలని కూడా ఆయన డిమాండ్ చేశారు.

ఈ అప్పగింత డిమాండ్‌పై భారత ప్రభుత్వం ఇంకా స్పందన తెలియాల్సి ఉంది. చీఫ్ ఆఫ్ ప్రాసిక్యూటర్ అమీనుల్ ఇస్లాం కూడా ఈ అభ్యర్థనపై స్పందించారు. హసీనాకు నిజంగా తిరిగి రావాలనే ఉద్దేశం లేదని ఆయన అభిప్రాయపడ్డారు. ఇది కేవలం రాజకీయ పితూరీ అని ఆయన విశ్లేషించారు.

2024 ఆగస్టులో విద్యార్థి ఉద్యమం తర్వాత హసీనా భారత్‌లో ఆశ్రయం పొందారు. ఆ తర్వాత మహమ్మద్ యూనస్ నేతృత్వంలో మధ్యంతర ప్రభుత్వం ఏర్పాటైంది. ఆ తర్వాత ఎన్నికలు జరిగి కొత్త ప్రభుత్వం అధికారంలోకి వచ్చింది. దీంతో బంగ్లాదేశ్ రాజకీయ సమీకరణలు పూర్తిగా మారిపోయాయి.

కొత్త ప్రభుత్వం హసీనాపై చట్టపరమైన చర్యలు తీసుకునే దిశగా కదులుతోంది. ఈ నేపథ్యంలో పాస్‌పోర్టు అభ్యర్థన ద్వారా అంతర్జాతీయంగా ఒత్తిడి తెచ్చే వ్యూహంతో ఆమె ముందుకు వెళ్తున్నారని నిపుణులు భావిస్తున్నారు.