నెల్లూరులో ₹500 అప్పు వివాదం: వృద్ధుడిపై వేడి నూనె పోసిన మహిళపై కేసు

నెల్లూరు రూరల్ మండలం మాదరాజు గోడూరు గ్రామంలో ₹500 అప్పు విషయంలో జరిగిన గొడవలో ఒక మహిళ వృద్ధుడిపై వేడి నూనె పోసింది. ఈ ఘటనలో ఆ వృద్ధుడు తీవ్రంగా కాలిన గాయాలతో ఆసుపత్రిలో చికిత్స పొందుతున్నారు.

గ్రామానికి చెందిన బద్రపూడి సీనయ్య టిఫిన్ కోసం షేక్ హసీనా నడుపుతున్న టిఫిన్ సెంటర్‌కు వెళ్తుండేవారు. నిన్న ఉదయం 10 గంటల సమయంలో ఆమె ఆయనను ₹500 బాకీ గురించి ప్రశ్నించింది. తాను ఇంట్లో పని చేసి ఆ బాకీ చెల్లించేశానని ఆయన చెప్పారు. ఈ విషయంపై ఇద్దరి మధ్య వాగ్వివాదం జరిగింది.

వాదోపవాదాల మధ్య ఆమె పొయ్యి మీద కాగుతున్న నూనెను తీసుకుని ఆయనపై పోసింది. దీంతో ఆయన ముఖం, పొట్ట, భుజం, కాళ్లపై కాలిన గాయాలయ్యాయి. సుమారు 20 నుంచి 30 శాతం వరకు కాలిన గాయాలని తెలిపారు. స్థానికులు ఆయనను నెల్లూరు ప్రభుత్వ ఆసుపత్రికి తరలించారు.

ఘటనపై పోలీసులు కేసు నమోదు చేశారు. అటెంప్ట్ మర్డర్ కింద కేసు నమోదు చేసినట్లు పోలీసులు తెలిపారు. నిందితురాలు షేక్ హసీనాను అదుపులోకి తీసుకున్నారు. ఆమెను ఈరోజు మజిస్ట్రేట్ కోర్టులో హాజరుపరుస్తున్నారు.