ఏపీ కేబినెట్ కీలక నిర్ణయాలు: డేటా సెంటర్లకు ఆమోదం, భీమిలిలో భారీ ఏఐ ప్రాజెక్టు

డేటా సెంటర్ల ఏర్పాటుకు ఏపీ మంత్రివర్గం ఆమోదం తెలిపింది. ముఖ్యమంత్రి చంద్రబాబు అధ్యక్షతన సచివాలయంలో జరిగిన మంత్రివర్గ సమావేశంలో ఈ నిర్ణయం తీసుకున్నారు. సమావేశంలో మొత్తం 34 అజెండా అంశాలపై చర్చించారు.

ఐటీ, ఏఐ, రోబోటిక్స్ రంగాలకు సంబంధించి మూడు కీలక విధాన నిర్ణయాలకు కేబినెట్ ఆమోదం తెలిపింది. 2026-31 ఏఐ విధానానికి, 2026-36 రోబోటిక్స్-ఫిజికల్ AI విధానానికి పచ్చజెండా ఊపింది. సెమీకండక్టర్ డిస్ప్లే ఫ్యాబ్ పాలసీ 4.0లో సవరణలకు సమ్మతి తెలిపింది.

అనకాపల్లి జిల్లా రాంబెల్లిలో డేటా సెంటర్ సొల్యూషన్స్ సంస్థకు అనుమతులు మంజూరయ్యాయి. ఈ సంస్థ ₹570 కోట్లతో మాడ్యులర్ ఎక్విప్మెంట్ తయారీ యూనిట్ ఏర్పాటు చేయనుంది. దీని ద్వారా 2,565 మందికి ఉద్యోగాలు లభిస్తాయి. తిరుపతి జిల్లా నాయుడుపేటలో ఎల్ఎఫ్పీ యూనిట్ ఏర్పాటు చేసే కార్బన్ కాస్మో సంస్థకు కూడా కేబినెట్ సమ్మతి తెలిపింది. ఈ ప్రాజెక్టు వల్ల 700 మందికి ఉపాధి లభిస్తుంది. తిరుపతిలో డక్సన్ సంస్థ ₹700 కోట్ల పెట్టుబడితో యూనిట్ ఏర్పాటు చేయనుంది. దీని ద్వారా 2,300 మందికి ఉద్యోగాలు వస్తాయి.

భీమిలిలో గ్రీన్ ఇంటిగ్రేటెడ్ ఏఐ డేటా సెంటర్‌కు ఆమోదం లభించింది. ఈ ప్రాజెక్టు సామర్థ్యం 512 మెగావాట్లు. మొత్తం పెట్టుబడి ₹31,387 కోట్లు కాగా, 1,000 మందికి ఉద్యోగాలు లభిస్తాయి. భోగాపురంలో రిలయన్స్ ఏఐ డేటా సెంటర్ కోసం భూముల బదలాయింపు ప్రతిపాదనకూ కేబినెట్ గ్రీన్ సిగ్నల్ ఇచ్చింది. అదాని క్లౌడ్ హబ్ ప్రాజెక్టు పురోగతిపై సమీక్ష నివేదికను కూడా మంత్రివర్గం పరిశీలించింది.

రావలి స్పిన్నర్స్ పరిశ్రమ విస్తరణకు అనుమతులు ఇచ్చారు. ₹236.92 కోట్ల విస్తరణ ద్వారా 1,569 మందికి ఉపాధి లభిస్తుంది. విజయవాడలో 15 మెగావాట్ల వ్యర్థాల నుంచి విద్యుత్ తయారీ ప్లాంట్‌కు ఆమోదం తెలిపారు. గ్రీన్‌కో సౌర ప్రాజెక్టు సామర్థ్యాన్ని 500 మెగావాట్ల నుంచి 1,500 మెగావాట్లకు పెంచనున్నారు.

మంగళగిరిలోని పోలీసు ప్రధాన కార్యాలయంలో ప్రత్యేక ట్రాఫిక్ మేనేజ్‌మెంట్, రోడ్ సేఫ్టీ డైరెక్టరేట్ ఏర్పాటుకు కేబినెట్ అంగీకరించింది. ఈ విభాగం DGP పరిధిలో పనిచేస్తుంది. ఐజీ స్థాయి అధికారి డైరెక్టర్‌గా వ్యవహరిస్తారు. టీటీడీలో రెండు కొత్త పోస్టుల ఏర్పాటుకూ ఆమోదం లభించింది.