కడపలో కార్తీక శోభ.. శైవ క్షేత్రాలకు పోటెత్తిన భక్తులు

కార్తీక మాసం నేపథ్యంలో కడప జిల్లాలోని శైవ క్షేత్రాలకు భక్తులు పెద్ద ఎత్తున తరలివస్తున్నారు. ఏపీ, తెలంగాణలోని అన్ని జిల్లాల నుంచి భక్తులు ఇక్కడికి వస్తున్నారు. కర్ణాటక, తమిళనాడు నుంచి కూడా భక్తులు దర్శనానికి వస్తున్నారు.

కమలాపురం నియోజకవర్గంలోని పొలతల దేవాలయం అతి పురాతనమైనది. ఈ ఆలయం అటవీ ప్రాంతంలో ఉంది. కార్తీక మాసంలో ఇక్కడ పూజలు వైభవంగా జరుగుతాయి. అదే నియోజకవర్గంలోని సంగమేశ్వర దేవాలయంలో శ్రీచక్రం ఉంది. ఇక్కడ రోజూ పూజలు నిర్వహిస్తారు. పాము వచ్చి పూజ చేస్తుందని ఈ ఆలయం గురించి ఒక ప్రతీతి ఉంది. కార్తీక మాసంలో ఈ దేవాలయం భక్తులతో కిటకిటలాడుతుంది.

రాజంపేట ప్రాంతంలోని అతిరాల దేవాలయం గురించి పరశురాముడి కథ ప్రచారంలో ఉంది. తల్లిని చంపిన తర్వాత పరశురాముడు ప్రతి నదిలో గొడ్డలిని కడిగారని, మరకలు పోలేదని ప్రతీతి. ఈ ఆలయం వద్ద నదిలో కడిగినప్పుడు గొడ్డలి చేతి నుంచి జారిపోయిందని చెబుతారు. ఇక్కడ భక్తులు గిరి ప్రదక్షిణ చేస్తారు. ఈ ప్రదక్షిణను కొత్తగా మొదలుపెట్టారు.

పుష్పగిరి దేవాలయాన్ని రెండో కాశీగా పిలుస్తారు. కార్తీక మాసంలో ఇక్కడ గిరి ప్రదక్షిణ చేస్తారు. పితరులకు పిండం పెట్టుకోవాలనుకునే భక్తులు ఇక్కడ మొక్కులు తీర్చుకుంటారు. ఇక్కడ పిండం పెడితే కాశీలో పెట్టినంత పుణ్యం వస్తుందని భక్తుల నమ్మకం.

బద్వేల్ నియోజకవర్గంలోని నిత్యపూజ కోన లంకమల అటవీ ప్రాంతంలో ఉంది. ఇక్కడికి 15 నుంచి 18 కిలోమీటర్లు కాలినడకన వెళ్లాలి. కొండ ప్రాంతం ఎక్కాల్సి ఉంటుంది. పోలీసులు, అటవీ శాఖ అధికారులు కట్టుదిట్టమైన భద్రత మధ్య భక్తులను పంపిస్తున్నారు.

రైల్వే కోడూరు నియోజకవర్గంలోని గుండాల కోన మరింత ప్రమాదకరమైన ప్రాంతం. రెండేళ్ల క్రితం ఇక్కడ ఏనుగుల గుంపు దాడి చేయడంతో సుమారు ఎనిమిది మంది చనిపోయారు. భక్తులు అడవి మార్గంలో చిన్న కోనలు దాటుకుని వెళ్లాలి. కొండ కింద నిత్యం నీరు పడుతున్న శివలింగం ఇక్కడ ఉంది. అటవీ శాఖ అధికారులు భక్తులను ఒక రాత్రి మాత్రమే అనుమతిస్తారు.