శ్రీశైలం కార్తీకోత్సవాలు ప్రారంభం: ఆర్జిత సేవలు రద్దు, స్పర్శ దర్శనం నిలిపివేత

శ్రీశైలం మల్లన్న దేవస్థానంలో కార్తీక మాసోత్సవాలు ప్రారంభమయ్యాయి. ఈ ఉత్సవాలు డిసెంబర్ 9 వరకు కొనసాగుతాయి. కార్తీక మాసం ప్రారంభం కావడంతో శివాలయాలకు భక్తుల రద్దీ పెరిగింది. శ్రీశైలం వెళ్లాలని భక్తులు ప్లాన్ చేసుకుంటున్నారు. ఆ మాసంలో శ్రీశైలానికి భక్తుల తాకిడి ఎక్కువగా ఉంటుంది.

భక్తుల రద్దీ నేపథ్యంలో దేవస్థానం అధికారులు ఆర్జిత సేవల్లో మార్పులు చేశారు. ₹5,000 గర్భాలయ అభిషేకాన్ని రద్దు చేశారు. ₹1,500 సామూహిక అభిషేకాన్ని కూడా రద్దు చేశారు.

శని, ఆది, సోమవారాల్లో స్పర్శ దర్శనాన్ని నిలిపివేశారు. ఆ రోజుల్లో స్వామి, అమ్మవార్ల అలంకార దర్శనం మాత్రమే ఏర్పాటు చేశారు. మంగళవారం నుంచి శుక్రవారం వరకు విడతల వారీగా మల్లన్న స్పర్శ దర్శనం కల్పిస్తారు.

నవంబర్ 20న శ్రీశైలంలో కోటి దీపోత్సవం నిర్వహిస్తారని దేవస్థానం అధికారులు తెలిపారు. భక్తులకు ఎలాంటి ఇబ్బందులు కలగకుండా ఏర్పాట్లు చేశామని అధికారులు పేర్కొన్నారు.