ముచ్చింతల్‌లో యతీంద్ర సప్తతి వేడుకలు: చిన్నజీయర్ స్వామి 70వ జన్మదినోత్సవం

రంగారెడ్డి జిల్లా ముచ్చింతల్‌లోని శ్రీరామనగరంలో యతీంద్ర సప్తతి వేడుకలు జరుగుతున్నాయి. శ్రీ శ్రీ త్రిదండి శ్రీమన్నారాయణ రామానుజ చిన్నజీయర్ స్వామి 70వ జన్మదినోత్సవం సందర్భంగా ఈ కార్యక్రమాలు నిర్వహిస్తున్నారు.

ఐదు రోజుల పాటు జరిగే ఈ వేడుకలు ఈ నెల 12వ తేదీ వరకు కొనసాగుతాయి. ఆధ్యాత్మిక ప్రవచనాలు, ప్రత్యేక పూజలు, వివిధ ధార్మిక కార్యక్రమాలు ఇందులో ప్రధాన ఆకర్షణగా ఉన్నాయి.

ఇవాళ మూడో రోజు గ్రంథావిష్కరణ కార్యక్రమం జరిగింది. డాక్టర్ సముద్రాల రంగమ రంగరామానుజాచార్య రచించిన నాలుగు గ్రంథాలను చిన్నజీయర్ స్వామి ఆవిష్కరించారు. ఈ గ్రంథాలు ధర్మానికి నిజమైన రక్షకులని ఆయన తెలిపారు. గ్రంథాల్లోని విషయాలను ప్రజలు తెలుసుకోవాలని సూచించారు. తెలంగాణ రాష్ట్ర సంకీర్తన మండలి ఆధ్వర్యంలో జానపద కళాబృందాల సమ్మేళనం కూడా జరిగింది.

ఇవాళ సాయంత్రం 4:30 గంటలకు విశ్వశాంతి కోసం నారసింహుని ప్రార్థన దీపాలతో హారతి కార్యక్రమం ఉంటుంది. సాయంత్రం 5 గంటల నుంచి శ్రీ విష్ణు సహస్రనామ విరాట పారాయణం జరుగుతుంది.

రేపు ఉదయం 8:30 గంటలకు తీర్థగోష్టి, ఉదయం 10 గంటలకు సమతా పురస్కారం ఉంటాయి. దేశ సేవలో వివిధ రంగాల్లో కృషి చేసిన 70 మందిని ఈ సందర్భంగా సత్కరిస్తారు. 11వ తేదీ మధ్యాహ్నం 12 గంటలకు మాతృసవనం పేరుతో ఆచార్య సేవలో ఉన్న 70 మంది మాతృమూర్తులను సత్కరిస్తారు. సాయంత్రం 5:30 గంటలకు శ్రీ కోదండరామునికి 33వ ఏకోత్తర సహస్ర కలశాభిషేకానికి అంకురారోపణ కార్యక్రమం ఉంటుంది.

ఈ నెల 12వ తేదీ ఉదయం 6 గంటల నుంచి ఏకోత్తర సహస్ర కలశాభిషేక మహోత్సవం నిర్వహిస్తారు.