మద్యం అమ్మకాల్లో భారత్ 10% వృద్ధి: ప్రపంచ మార్కెట్లో అత్యధికం

గ్లోబల్ మార్కెట్ రీసెర్చ్ సంస్థ IWSR చేసిన సర్వే ప్రకారం, ఈ సంవత్సరం జనవరి నుంచి జూన్ మధ్య కాలంలో భారత్‌లో మద్యం అమ్మకాలు 10% పెరిగాయి. ప్రపంచవ్యాప్తంగా మద్యం వినియోగం తగ్గుతున్న సమయంలో భారత్ అత్యంత వేగంగా వృద్ధి చెందిన మార్కెట్‌గా నిలిచింది.

ఈ సర్వేలో ప్రపంచంలోని 21 ప్రధాన మద్యం మార్కెట్లను పరిశీలించారు. ఈ 21 దేశాలే ప్రపంచ మద్యం వినియోగంలో 76% వాటా కలిగి ఉన్నాయి. ఈ మార్కెట్లలో మొత్తం వినియోగం 1% తగ్గింది. అతిపెద్ద మార్కెట్ అయిన అమెరికాలో అమ్మకాలు 4% పడిపోయాయి. చైనాలో 3% తగ్గాయి. అమెరికా, చైనాలను మినహాయిస్తే మిగిలిన మార్కెట్లలో కేవలం 1% వృద్ధి మాత్రమే నమోదైంది.

భారత్‌లో అన్ని విభాగాల్లోనూ అమ్మకాలు పెరిగాయి. బీర్ వినియోగం 16% పెరిగి అత్యధిక వృద్ధి నమోదు చేసింది. రెడీ టు డ్రింక్ ఆల్కహాలిక్ బెవరేజెస్ 12% పెరిగాయి. బ్లెండెడ్ స్కాచ్ విస్కీ 8% పెరగ్గా, vodka, gin బ్రాండ్లు చెరో 6% వృద్ధి సాధించాయి. ఎక్కువగా అమ్ముడయ్యే ఇండియన్ విస్కీ 4% పెరిగింది. rum, non-cognac బ్రాండ్ల అమ్మకాలు 3% పెరిగాయి. వైన్ అమ్మకాల్లోనూ సానుకూల ధోరణి కనిపించింది.

అత్యధికంగా పెరిగిన విభాగం నాన్ ఆల్కహాలిక్ బీర్. భారత్‌లో ఈ బీర్ల వినియోగం 25% పెరిగింది. ప్రపంచ మార్కెట్లలో ఇదే విభాగం 8% మాత్రమే పెరిగింది. వృద్ధి రేటు ప్రకారం చూస్తే భారత్ 10% తో మొదటి స్థానంలో ఉంది. కొలంబియా 9%, దక్షిణాఫ్రికా 5%, బ్రెజిల్ 3%, యూకే 2% తో తర్వాతి స్థానాల్లో ఉన్నాయి. మెక్సికో, థాయిలాండ్ లలోనూ అమ్మకాలు పెరిగాయి.

ప్రపంచ మార్కెట్లలో అమ్మకాలు తగ్గడానికి పలు కారణాలు ఉన్నాయి. మద్యం తాగడం తగ్గించాలనే ఆలోచన ప్రజల్లో పెరుగుతోంది. బరువు తగ్గేందుకు వాడే GLP-1 డ్రగ్స్ వాడకం కూడా మద్యం వినియోగంపై ప్రభావం చూపుతోంది. అమెరికాలో ద్రవ్యోల్బణం, టారిఫ్లు, ఆర్థిక అనిశ్చితి వినియోగదారుల కొనుగోలు శక్తిని దెబ్బతీశాయి. చైనాలో మందగించిన ఆర్థిక వ్యవస్థ కారణంగా డిమాండ్ పడిపోయింది.

గ్లోబల్ బ్రాండ్లు ఇప్పుడు తమ వ్యాపార విస్తరణ కోసం భారత్ వైపు చూస్తున్నాయి. మద్యం కంపెనీలకు భారత్ లాంటి మార్కెట్లు చాలా కీలకమైనవిగా మారాయి.