ఖర్జూర సాగుతో అనంతపురం రైతు రమణారెడ్డికి రూ.78 లక్షల లాభం

అనంతపురం జిల్లా గారి దిన్నె మండలం కొటంక గ్రామానికి చెందిన రమణారెడ్డి ఖర్జూర సాగుతో మంచి లాభాలు ఆర్జిస్తున్నారు. ఆరు సంవత్సరాల క్రితం అబుదాబీ నుంచి 600 టిష్యూ కల్చర్ మొక్కలు తెచ్చి 6 ఎకరాల్లో నాటారు. ఇప్పుడు మూడో పంట కోత కొనసాగుతోంది. ఇప్పటికే 35 టన్నుల ఖర్జూరం విక్రయించారు. మొత్తం 90 టన్నుల వరకు దిగుబడి వస్తుందని అంచనా.

పంట మొత్తం 90 టన్నులు పండితే, టన్ను సగటు ధర రూ.లక్ష నుంచి రూ.1.30 లక్షల వరకు లభిస్తోంది. దీంతో మొత్తం ఆదాయం రూ.90 లక్షల వరకు రాగా, పెట్టుబడి రూ.12 లక్షలు పోను రూ.78 లక్షల నికర లాభం వస్తుంది. ఇది బర్హీ వెరైటీ ఖర్జూరం. తాజాగా తినగలిగే ఈ రకం చాలా తీపిగా ఉంటుంది. సేంద్రియ పద్ధతిలో పండించడం వల్ల నాణ్యత మెరుగ్గా ఉంటుందని రైతు చెబుతున్నారు.

చెట్టుకు 10 గెలలు మాత్రమే ఉంచి పండు సైజు పెంచుతున్నారు. చీడపీడల నియంత్రణకు క్లోరోఫై 50 వంటి మందులు వాడుతున్నారు. మార్కెటింగ్ కోసం సోషల్ మీడియాను ఉపయోగించుకుంటున్నారు. చెన్నై, కోయంబత్తూరు, బెంగళూరు నుంచి వ్యాపారులు నేరుగా తోట వద్దకే వచ్చి కొనుగోలు చేస్తున్నారు.

అనంతపురం జిల్లాలో ఎండలు ఎక్కువ, వర్షపాతం తక్కువ కావడంతో ఖర్జూర సాగుకు అనుకూలమని రమణారెడ్డి గుర్తించారు. ఆయన ఇంతకుముందు డ్రాగన్ ఫ్రూట్, ఇజ్రాయెల్ నుంచి తెచ్చిన కేఎల్డీ యాపిల్ వంటి ప్రయోగాలు కూడా చేశారు. కొత్త పంటలపై ఆసక్తి ఉన్న రైతులకు తన అనుభవం స్ఫూర్తిదాయకమని ఆయన అభిప్రాయపడ్డారు.