ఏపీ ప్రభుత్వ రెండేళ్ల పాలన: తిరుపతి, అమరావతి, విశాఖలో బహిరంగ సభలు

ఆంధ్రప్రదేశ్ రాష్ట్ర ప్రభుత్వం తన రెండేళ్ల పాలన మైలురాయిని పురస్కరించుకుని జూన్ 9 నుంచి 20 వరకు రాష్ట్రంలో విస్తృత ప్రచార కార్యక్రమాలు నిర్వహించనుంది. ఇందులో భాగంగా తిరుపతి, అమరావతి, విశాఖపట్నంలో మూడు ప్రధాన బహిరంగ సభలు ఏర్పాటు చేశారు.

జూన్ 9న తిరుపతిలో జరిగే తొలి సభలో ప్రభుత్వం అమలు చేస్తున్న సంక్షేమ పథకాలపై దృష్టి పెడతారు. జూన్ 12న అమరావతిలో జరిగే రెండవ సభలో పాలనలో సాధించిన విజయాలు, మంచి పాలనపై చర్చిస్తారు. జూన్ 15న విశాఖపట్నంలో జరిగే మూడవ సభలో పారిశ్రామిక మౌళిక సదుపాయాల అభివృద్ధి, పెట్టుబడుల గురించి వివరిస్తారు. ఈ మూడు ప్రధాన సభలతో పాటు జిల్లా కేంద్రాల్లో ప్రత్యేక సమావేశాలు నిర్వహించి కార్యకర్తల్ని, ప్రజల్ని భాగస్వామ్యం చేయనున్నారు.

కేంద్రంలో ప్రధాని నరేంద్ర మోదీ నేతృత్వంలో ఎన్డిఏ ప్రభుత్వం 12 ఏళ్లు పూర్తి చేసుకున్న సందర్భంగా, కేంద్ర ప్రభుత్వం తీసుకువచ్చిన అభివృద్ధి, సంక్షేమ కార్యక్రమాలను కూడా ఈ ప్రచారంలో భాగంగా ప్రజల్లోకి తీసుకెళ్లనున్నారు. ముఖ్యమంత్రి చంద్రబాబు నాయుడు, ఉపముఖ్యమంత్రి పవన్ కళ్యాణ్ ఈ ప్రణాళికలను సిద్ధం చేయాలని ఆదేశించారు. రాష్ట్ర ప్రభుత్వం తన రెండేళ్ల పాలనలో సాధించిన ప్రగతిని, కేంద్ర ప్రభుత్వ 12 ఏళ్ల పాలనలో వచ్చిన మార్పులను కలిపి ముందుకు తీసుకెళ్లే వ్యూహంగా ఈ కార్యక్రమాలను రూపొందించినట్లు అధికార వర్గాలు తెలిపాయి.