ఆంధ్రప్రదేశ్‌లో భీకర వేసవి: 204 మండలాల్లో 45°C పైన ఉష్ణోగ్రతలు

ఆంధ్రప్రదేశ్‌లో వేసవి తీవ్రత పెరిగింది. నిన్న పిడుగురాళ్ళలో 47.6°C గరిష్ట ఉష్ణోగ్రత నమోదైంది. ఇది రాష్ట్రంలో నమోదైన అత్యధిక ఉష్ణోగ్రత.

రాష్ట్రవ్యాప్తంగా 204 మండలాల్లో 45°C పైన ఉష్ణోగ్రతలు నమోదయ్యాయి. పార్వతీపురం మన్యం, అల్లూరి సీతారామరాజు, పోలవరం, అనకాపల్లి, కాకినాడ, కోనసీమ, తూర్పు గోదావరి, పశ్చిమ గోదావరి, ఏలూరు, NTR, కృష్ణా, గుంటూరు, బాపట్ల, ప్రకాశం, పల్నాడు జిల్లాల్లో 45–47°C ఉష్ణోగ్రతలు నమోదవుతున్నాయి. విజయనగరం, మార్కాపురం జిల్లాల్లో 43–45°C ఉన్నాయి. నెల్లూరు, విశాఖపట్నం, శ్రీకాకుళం, తిరుపతి, చిత్తూరు, కర్నూలు, కడప, అనంతపురం జిల్లాల్లో 40–42°C నమోదవుతున్నాయి.

CM చంద్రబాబు నాయుడు అధికారులతో సమీక్ష సమావేశం నిర్వహించారు. మున్సిపల్, వైద్య ఆరోగ్య శాఖ అధికారులను అప్రమత్తం చేశారు. పలు మున్సిపల్ ప్రాంతాల్లో water kiosks, చలివేంద్రాలు ఏర్పాటు చేశారు.

ఉదయం 11 నుంచి సాయంత్రం 4 గంటల మధ్య బయటికి వెళ్ళవద్దని ప్రభుత్వం హెచ్చరిస్తోంది. వడదెబ్బ నివారణకు తగినంత నీరు తాగాలని, ORS ఉపయోగించాలని సూచిస్తోంది. తెలుపు లేదా లేత రంగుల cotton దుస్తులు ధరించాలని, తలను కప్పుకోవాలని కూడా చెప్తోంది.

శిశువులు, చిన్నపిల్లలు, గర్భిణులు, BP–గుండె జబ్బులు ఉన్నవారు, ఒంటరి వృద్ధులు వడదెబ్బకు ఎక్కువగా గురయ్యే అవకాశం ఉందని అధికారులు హెచ్చరిస్తున్నారు.

వాతావరణ శాఖ, విపత్తు నిర్వహణ శాఖ అధికారుల ప్రకారం మే 25 వరకు ఈ పరిస్థితి కొనసాగే అవకాశం ఉంది. ఆ తర్వాత నైరుతి పవనాలు కేరళను తాకినప్పుడు ఉష్ణోగ్రతలు తగ్గే అవకాశం ఉందని తెలిపారు.