ఏపీలో వర్షాలతో పాటు తీవ్ర వడగాలులు — NDMA హెచ్చరిక

ఆంధ్రప్రదేశ్‌లో కొన్ని జిల్లాల్లో పిడుగులతో కూడిన తేలికపాటి వర్షాలు కురిసే అవకాశం ఉందని అమరావతి వాతావరణ శాఖ తెలిపింది. మన్యం, అల్లూరి, పోలవరం, చిత్తూరు, అనంతపురం, కర్నూలు జిల్లాల్లో ఇలాంటి వర్షాలు కురిసే అవకాశం ఉందని పేర్కొంది.

ఆదివారం మార్కాపురం జిల్లా ఖంబంలో 43.3°C గరిష్ట ఉష్ణోగ్రత నమోదైంది. రాష్ట్రంలోని 28 జిల్లాల్లో 14 జిల్లాల పరిధిలోని 65 మండలాల్లో 40°C కంటే ఎక్కువ ఉష్ణోగ్రతలు రికార్డ్ అయ్యాయి. ఈ రోజు శ్రీకాకుళం, విజయనగరం, మన్యం, NTR, గుంటూరు, బాపట్ల, పల్నాడు, మార్కాపురం, ప్రకాశం, నెల్లూరు, కర్నూలు, నంద్యాల, అనంతపురం, YSR కడప, తిరుపతి జిల్లాల్లో 42–44°C ఉష్ణోగ్రతలు నమోదవుతాయని అధికారులు తెలిపారు.

శ్రీకాకుళంలోని ఆముదాలవలస, బూర్జ, హిరమండలం, కంచిలి, నందిగం, పాతపట్నం, సోంపేట మండలాల్లో వడగాలులు ఉంటాయని హెచ్చరించారు. విజయనగరంలోని పలు మండలాలు, మన్యం జిల్లాలోని పలు ప్రాంతాల్లో కూడా ఎండ తీవ్రత ఎక్కువగా ఉంటుందని తెలిపారు.

విదర్భ పరిసర ప్రాంతాలపై ఉన్న ఉపరితల ఆవర్తనం నుంచి కర్ణాటక, తమిళనాడు మీదుగా మన్నార్ వరకు ద్రోణి విస్తరించి ఉందని AP NDMA MD ప్రకార్ జైన్ తెలిపారు. దీని ప్రభావంతోనే మన్యం, అల్లూరి, పోలవరం, కర్నూలు, అనంతపురం, చిత్తూరు జిల్లాల్లో వర్షాలు కురిసే అవకాశం ఉందన్నారు.

రేపు 28 మండలాల్లో తీవ్ర వడగాలులు వీచే అవకాశం ఉందని NDMA హెచ్చరించింది. ఉదయం 10 గంటల నుంచి సాయంత్రం 5 గంటల వరకు అత్యవసరమైతే తప్ప బయటకు రావొద్దని వైద్యులు సూచించారు.